ماجور يانواف
أولاً متأسف جداً للإطاله .... ولكن أبو نواف يعلم الله أننا لو كتبنا معلّقات به لن تكفيه ...
ثانياً بسبب إعجابي بالقصيدة بعثتها لكم أحبتي .....
إعــــــــــــــــــــــــذروني
[poet font="Simplified Arabic,4,white,bold,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
جيت الرياض ولفّه أحزان وغيوم ... والدمع جيته من محاجره ذايب
جيت الحزن منصوب وأطنابه هموم ... وبرفّته شفت الأسى والغلايب
وجيت العيون من الحزن صحّت النوم ... وجيت الحزن صحّا نعاس الهدايب
والعطف جيته عابس الوجه مهموم ... لمحت في وجهه هموم وعجايب
وجيت الوفا تايه عن الدرب منجوم ... يسأل عن اللي تحتضنه الترايب
وجيت الكرم بابه مسكّر وملجوم ... ومبناه تلعب به رياح الهبايب
وجيت العطا مقبوض كفّه ومضموم ... عقب البذل والجود عقب الوهايب
وجيت الونس وجهه من الحزن ماسوم ... وسألته بربه وشنهي المصايب
جاوبني بصوتٍ مكسّر ومثلوم ... وناظرني بعينٍ بها الدمع رايب
قال العزا باللّي على الخير مفطوم ... وجه الوفا اللّي تحتضنه النصايب
عزيز قوم اليوم ينعونه القوم ... ولأجله عيون القوم تهطل سحايب
طلال أبو نواف ودّعني اليوم ... وضاقت بي إفجوجٍ وساعٍ رحايب
حسّيت في صدر العزا رمح مسموم ... وحسّيت في صدري توقّد لهايب
قلت البقا للّه والعمر مقسوم ... ماغاب لو زوله عن العين غايب
لو كان مثلك حيل ياشيخ معدوم ... يامن رقيت بطيبك أعلا الرقايب
مرحوم ياحسن الخلق قمة الشوم ... تشوم بك نفسك ياعرب النسايب
مرحوم ياللّي بالفخر تعشق الحوم ... تعشق دروب الطيب وأهل الوجايب
مرحوم ياشيخ المواجيب مرحوم ... يامن بفزعاتك تغيض النوايب
ياما بهجت لصدر بائس ومحروم ... وياما دعمت إعلاج طفلٍ وشايب
وياما نصرت بفزعتك حق مظلوم ... بالحق غِضت أهل الجشع والنهايب
وياما عطيت بسِر ماهو بمعلوم ... شخصٍ نصاك وراح راضي وطايب
وياما بنيت أفكار وآمال وحلوم ... شخصٍ نظرها في عيونه صعايب
يالله عسى وجهك عن النار معصوم ... بجنان خِلدٍ مطمئن غير هايب
ويالله يامعبود يافارض الصوم ... ياواحد لبيته تشد الركايب
ياسايقٍ مزنه على كل مزموم ... وسقت الرطب مابين عسب وكرايب
يالله ياللّي تكسي العظم بلحوم ... تكسيه بالسندس وتقبله تايب
الحمد لله والبقا له على الدوم ... الله يلهمنا الصبر بالنوايب
للخلد أبو نواف للخِلد مرحوم ... وماجور يانواف بأغلى الحبايب
[/poet]
الشاعر : نايف حزل العنيزان
رد مع اقتباس
المفضلات