الأخ العزيز : الضيغمي
بما انك تركت الباب مفتوح للتعديل والأضافه
فاسمح لي بها التعديل البسيط , بعد اذنك اخي الكريم
هذه المعركة ليست بين بني هلال انفسهم
بل بين ثلاثين من بني هلال واشترك منهم عشره فقط
وثلاثة الاف والبعض يرويها الف من الاتراك .
والملخص للحادثه , واعذرني مقدما ً فالقصيده موجوده
عندي بالبيت برواية احد الشيبان وانا اكتب من الكوفي شوب
..
والسالفة اجيبها لك من اولها بأختصار :
مات قايد الهلالي عن سبع بنات وولد اسمه سرور صغير في السن
وخلف وراءه ثروة كبيره , وذلك ان قايد الهلالي من امراء بني هلال ...؟
وكان ابنه سرور , لاهي في الحياه غير مهتم بأمور الحرب ومسؤلياته
كأبن لأحد امراء بني هلال وزعمائهم , ولايهتم بما يهم الرجال
خصوصا ً وان بني هلال يخوضون مناخ مع الزناتي خليفه وحروب شديدة
والحرب سجال فيما بينهم وبين الزناتي ...
وسرور بن قايد يعيش عيشه مترفه ولايهتم بما حوله
مما جعل بني هلال يظنون ان نار قايد الهلالي انطفئت
وكما تعلم العرب ترغب بالزواج من بنات الفرسان والشجعان
لكي يكونوا ابنائهم على شاكلتهم , واما غيرهم فلايقربون بناتهم
ولهذا اخوات سرور بن قايد لم يتقدم لخطبتهن احد .
قامن خوات سرور وتجمعن عليه وصارن يحثنه على المراجل
وافعال الشجاعه , واخلاق وصفات الامراء ,,
وهن في غاية التعمق والانغماس في الشرح والتفصيل لاخوهن سرور
كان سرور لاهي عنهن في امر آخر , اذ كان ينظر الى بقرة له ويرقبها
وبينما الاخوات منهمكات في حديثهن قال سرور :
ياكثر الذبان على طيز سحمه!!!!!!!!!!!!
والبعض يقول اربعين ذبانه على طيز سحمه!!!!!!!!
وسحمه هي بقرة سرور!!!!!
وذهبت مقولته مثلا ً مشهورا ً , واعذرني على اللفظ الذي يحويه المثل
ولكن الامثال سماعيه نوردها كما هي , وليس لي يد في صنعها ؟؟؟؟
فقامن اخواته يندبن حظهن وتفرقن عنه ,
ثم قامن بمشاورة احدى عجائز بني هلال التي قالت لهن :
متى ماطلب شي , قومن قومه وحده وكل وحده من السبعه
تجيب له الشي اللي يطلبه؟؟
طلب سرور لبن او ماء , فقامن سبعتهن وكل واحده من اخواته في يدها اناء
به الماء الذي طلب؟
قالهن سرور : ليش كل وحده منكن جابت لي ماء ؟
قالن : ياخوي حنا عذارى , وانت سترنا , ولالنا بـالـهـدنـيـا أحد غيرك ,
وعلينا خدمتك وطاعتك ..؟؟؟
فطن الولد , ,,,
شاف خواته كلهن عنده سبعتهن , ومابهن اللي تزوجة
وعرف ان هالشي بسببه ,,,,
وهو يفز من المجلس ويدخل على بني هلال
قال تراني انا اليوم جنب مع البل والذبايح اليوم علي؟؟
قالوا : انت صغير وبعدك ما اكتملت , ولايجنب مع البل الا
اللي تدخل سنون المشط بلحيته .
قال وين المشط , وهو ياخذه , ومابوجهه الا شعر بسيط وهو يغرزه
المشط بجلده لين دخلت سنون المشط بلحمه ؟؟؟
قال دخلت سنون المشط ولا ّ مادخلت ؟؟؟؟
شافوه زعلان وخربانه الامور معاه
قالوا : الا دخلت , اليوم عليك الذبايح وانت معنا جنب؟؟
وعند البل هكاليوم جنب ثلاثين من بني هلال
وانصبت عليهم غارة من الترك بقيادة عبد اسمه وهق ,,
عددها ثلاثة الاف وبعضهم يقول الف حسب رواية البيت الاول ...
الشاهد قول ذياب بن غانم :
جونا ثلاث الاف تعد خيلهم ::: وحنا ثلاثين مانزود زايد
وبعضهم يقول :
هم جونا الف تعد خيلهم ::: وحنا ثلاثين مانزود زايد
الثلاثين عشره هربوا , وعشره من بعيد يشوفون المعترك
ومااشتركوا مابين متردد وخايف ,,,,
وخاضوا غمار المعركة عشره هم ابا زيد وذياب بن غانم وسرور ابن قايد وغيرهم سبعه ,,,
ومع البل ينطحون عنها , وهم والترك طراد عندها ,
واتعبهم العبد وهق , لشجاعتة واقدامه وسلاحه اللي ماتعودوا عليه
وسلاحه رمح طويل , طوله تسعةابواع وهم مايعرفون غير الشلف وهي الرماح القصيرة
والترك اتعبها ذياب , وقاموا ينخون وهق ,
ينخون خيال ٍ بهم يمدحونه ::: يقولون وهق يابالعوايد
هد على ذياب وهو يعطيه الرمح , ياهو مطشر احلاق الدرع من على صدر ذياب
من قوة يمينه ,,,
ظربني برمح ٍ تسعة ابواع طوله ::: يالدرع غادي ٍ من على صدري بجايد
ثم يعرض بنسب وهق وانه ابن زنا لابا زيد عندما سافر لتونس حيث يقول :
انا اشهد انه لابا زيد زنوه ::: من روحته اللي ماجاب بيها الفوايد
رما ه وطاح ذياب , والترك تبي تذبحه
ويثني عليه ولد اخته سرور بن قايد وهو يشيل الترك وتصير عليهم الهزيمه
يوم يقول ذياب :
نهظت راسي من بعد ســدره ::: الى الخيل يادبها سرور ابن قايد
وبعد هذا البيت بيت يذكر فيه ذياب ان سرور ورث الفروسيه عن ابيه
ولكن البيت غاب عن بالي ؟؟
هالقصيدة قالها بعد ماهزموا الترك وهو مصوب
ويوم سمعه ابا زيد يمدح سرور بن قايد ولا مدحه
جاه ابا زيد يبي يذبحه بسيفه , فقال ذياب
حنا عصافير وابا زيد سدرة ::: نذرى بها عن مرهفات الحدايد
ويوم سمعوا بني هلال القصيده , وان الولد طالعن على ابوه
وان نار قايد الهلالي ماطفت وللحين شابه
اجتمعوا كلهم ببيت سرور بن قايد يخطبون
وخواته سبعتهن تزوجن من ليلتهن , عقب هالفعل اللي ظهر منه.
وهالحادثه سواء كان الترك فيها الف او ثلاثة الاف من حيث العدد
ليس بالضرورة ان تكون من نحل الرواة واختلاقاتهم , وتصوير فرسان بني
هلال على ان لهم قوى خارقه , فقد جرى في العصور المتأخره
مثلها الكثير ,
هذا اللي اعرفه والقصيده ماني حافظها العذر والسموحه منك
ملاحظه : البعض يروي سالفة سحمه للزير سالم والصحيح
انها لسرور بن قايد الهلالي
وتحياتي لك ,, واعذرنا من القصور ,,
رد مع اقتباس
المفضلات