[c]السلام عليكم ورحمة الله وبركاته :
اولا انا ماني شاعر
ولا اعتبر نفسي شاعر في اي حال من الاحوال
لكن الاخ الاشعل اصر اني اكتب قصيده
فكانت هذه .....
لا يغركم العنوان تروني بس حبيت اغيّر
كل واحد يحط عنوان قصيدته الاولى مصافحه اولى قلت ابغير :D
اهداء الى الاشعل :
[/c]
[poet font="Simplified Arabic,16,white,bold ,normal" bkcolor="transparent" bkimage="" border="double,0,gray" type=0 line=200% align=center use=sp char="" num="0,black"]
يابن مريقب ضامني منظر الذيب = عند المحطه يلتظي حر جمره
من عقب ماهو بعاليات المراقيب = واليا عوا تهتز قيعان حدره
في وسط شبك ٍ لو دعى ماله مجيب= يبي يعوي لاشك جضّه بصدره
مثلك انا ياذيب شفت الاعاجيب= واهتلت من وقتي احترت بامره
انا بدوي اصل ٍ وفصل ٍ بلا ريب = عريب ساس ٍ حر من بطن حرّه
ماهمني من الوقت (لكزس) ولا (جيب) = وجدي على ذود ٍ يروحن صفره
في ديرة ٍ ما تشوف معمل ولا ( بيب) = قبلي اجا مابين حمره وسمره
اشره على الطيّب واغلي هل الطيب= ولا الرّدي ما يلحقه وزن ذرّه
الطيّب ليا غاب وقت المواجيب = حق ٍ لنا عليه حق نتشره
ان ما صفن له صافيات المشاريب = خطو الفتى وش يرجي بطول عمره
احد ٍ بهالدنيا مداهيله العيب = و احد ٍ دروب الشك ما قط مرّه
وكم من غشيم ٍ لو ملا وجهه الشيب = لو تنشده ما اعطاك من العلم قطره
وكم من سفيه ٍ قالها اخطيا تصيب = وكم من حكيم ٍ قال واحتق جزره
ساعات سبع ٍ طب الاخطار ما يجيب = وبعض الهوايش رزقها في مقرّه
وكم من مريض ٍ عقب الايّاسة يطيب = مار البلا اللي طبّه بوسط قبره
[/poet]
عاد ما يحتاج اوصيكم بالمدح تكفون خلوني احسن من المتنبي وابو زويد :DD
رد مع اقتباس
المفضلات