عندي سوعااال خطير !! وبدون تعليقات يالريم !!

[align=center]انا جاية طايرة من اقصاي بساعد وشفت البنات ماقصرو

والأهم أنه صلح معك ياريوم[/align]

[align=center]

اقتباس:

---

شوفي وبكل بساطه :

حطي كوب سكر في مقلايه او قدر صغير

وحركيه على نار هاديه وبهالوقت تكونين فاتحه علبة القشطه وحاطته

قريبه من النار عشان تسخن

( لأنه سبب المشكلة اللي تواجهك بارد + حار + دفعة وحده )

المهم :

لمّا يذوب السكر ويصير بني فاااااااتح خوذي بالملعقه من القشطه

واضيفي ملعقة قشطة للسكر وحركي بسرعه ولاتضيفين الملعقة

الثانية من القشطه لين يتجانس اللي اضفتيه من قبل ..

وكل بعد كم ثانيه اضيفي لك ملعقة من القشطة الدافيه

وهكذاااااااااااااااا لين تنتهي الكميّة


وبــــــــــس

---

معليش مجمج مضطرة أدق على طريقتس للضرورة المطبخية :)

الحين بالله هذي سهلة !!؟

كل هالعفسة وهالتقسيط وعلى دفعات وحالتكم حالة عشان توفي :) الظاهر الوقت اللي بياخذه منكم تصليح التوفي بيصير أطول من وقت الطبخة كلها :)

ريومة ,, مالتس الا طريقتي لو تحوسين الدنيا حوس ,,

طريقتي بس ثلاث مقادير ولا تاخذ منك غير وقت تذويب السكر فقط لاغير :)

<<<<<<<<<< أنفع مندوبة مبيعات على هالإغراءات :)

هاه وش قلتي ,, حبة الراس والخشم وإلا تقعدين تمطرسين تالي الليل كالعادة :)[/align]

[align=center]8
8
8

ياحبي لك ريّومـــه :)

برساله خاصة قولي لي وش عندك من طريقة ( زوليّه )

تراها تنفعني وقت الزنقات

ووعد مني ماأعلم ريم أبد أبد أبد :)[/align]

.

[align=center]ياحبي لك ريّومـــه

جيت طايرة بساعدتس وشفت البنات ماقصرن :)

والأهم أنه صلح معتس ولاتنسين تسوين لي كيك وتوفي وحلا وقهوه وشاهي .....الخ :)

التوفي طريقته سهله ونفس طريقه مجمج :)

اها بالله سكتي الشيف الريم :)

صح تذكرت الريم وين الحلا :a:


:480r:

[/align]

فصفص
بنت النور
تسلمون ياعمري يكفيني حضوركم


مجمج

افاااااااااااا هذي تاليتها :(

بس تصدقين انا حاسه انها خطه

تاخذين منها الطريقه وترسلينها لي

ادري مااهون عليتس :d:



ريومه

للاسف تنفعين مندوبة مبيعات ونص :(

شكلي تأثرت بالدعايه :359r:

او يمكن لقافه

المهم حبة الراس بتجيك بالجوال :thumb:

اما الخشم معصى

غير خشم ابوي مااحبه :148r:


يالله عاد اخلصي علينا عطينا الوصفه السحريه

للقنبله النوويه :055r:

شكلي بديت احقد على هالتوفي :)

[align=center].

اقتباس:

---

تاخذين منها الطريقه وترسلينها لي

---

زين كذا بالله كشفتيني ؟؟ :)


الحين وش يفكني من الشيخه بالله ؟؟؟ :)


ريمووو :

الحمد لله اللي ضبطت معك الطريقه

[لوحة8]وأي شي ماشيّّات تراني فداياك يالغاليه[/لوحة8][/align]
.

[align=center]معليش تم حذف المشاركة لتكرارها ولأن فيها تسطيل غير طبيعي بفعل الأمطار وهبوب الرياح الموسمية الربيعية الجنوبية الشرقية :)

والمشاركة الأصلية تلقونها بعد رد ريومة :)[/align]

8
8
8
:408r::408r::408r::408r:
:408r::408r::408r:8

[align=center][لوحة4] ماقلت لتس الله لايحيجتس لي :) [/لوحة4]

حبيت أمرمط بتس شوي خصوصا بعد ماضمنت بوسة الجوال :) >>> النذالة شغالة :)

والله ياريومة مالتس علي يمين ,, لو انتس بالرياض كان عطيتي روحتس ركبة وعذرتيني على هالتطنيشة :)

وقسمن جو مهبول غير طبيعي وأمطار وسيول وغرق وسعة صدر تخليتس تعافين الدنيا كلها :) >>> الله من زين التعبير :)

بر الرياض تحول بقدرة قادر إلى بحيرات عذبة :) والشعبان كلها ماشية :)

لا ,, وكله كوم وملهم كوم ثاني :) >>>> مسوية جولة تفقدية لضواحي الرياض :)

أبشرتس صار فيها شلالات ماهنا بعد عن شلالات نياقرا :) كل جبل ينافس الجبل اللي جنبه بشلالين ثلاثة :)

مرينا مع طريق سدير القديم قبل البير بشوي :) واثر السيل عامل عمايلوه فيه :)

فاتس بغيت أوهقهم :) فيه نزلة في الطريق قاطعها السيل ولو تمر معها السيارة الصغيرة تصير كبيرة :) >>>> ياملحي على هالوصف :)

قصدي ان الداخل مفقود والخارج مولود :) >>>> ايه هذا الحتسي اللي يجمد على الشارب :)

طبعا مثلتس عارف سيارتنا لاهي جيب ولا شاص :) ولا حتى هايلكس :)

من هالسيارات الخكرية :)

قالوا لازم نرجع لأن سيارتنا ماتقدر تقطع هالطريق ,, قلت الا والله تقدر :) قبل شوي مارة سيارة وطلعت منه ,, ترى شكل الطريق كذا بس ,,والا هو تراه مايوهق :) >>> الا والله أنا اللي أوهّق :)

المهم حلفت لهم اني شفت سيارة مارة من عنده وطلعت زي الشعرة من العجينة :) بس اللي ماقلته لهم هو ان هالسيارة جيب :) >>> بس ماأتوقع هالمعلومة مهمة بالحيل :)

المهم جيناتس داعسين :) ولا والله هالموية تغطي كبوت السيارة ونص القزازة :) :)

طبعا خذي وخلي ,,العالم يدعون علي وأنا فاطسة من الضحك :) >>> الله من البرود :)

بس أبشرتس طلعت النتيجة سليمة :) وكل شيء تمام التمام ,, والأحلى إن هالعالم بسياراتهم وجيوبهم قاعدين يتفرجون علينا وأحس بنظرات الإعجاب في عيونهم :) :) بس قهر مادروا إنها فكرتي :)

تقريبا درنا قرى سدير كلها ابتداء بالرياض :) >>> معليش خليت الرياض قرية من قراها :)

وانتهاء بالمجمعة :) والله ياهي سايلة وسدها يجيب لتس دوار السيل :) :)

عاد ودي إننا مكملينها وواصلين عندكم في الارجنتين :) بس ماكتب الله :)

ريومة ,, الظاهر سؤالتس كان عن التوفي والا لأ ؟؟ :)

يالله قلت أسولف لتس عن رحلتنا في هالمطر عشان تعذريني على هالتأخير :)

التوفي يابعدي سهل ,,

حطي لتس نص كاس سكر ويفضل انه يكون نويعم حبتين :) حطيهم في مقلى تيفال أو قدر تيفال ,, أهم شيء يكون تيفال :)

وخليه يذوب على نار هادية وان كانتس مقلعة زيدي على النار كنتس مادريتي :) بعدين اذا بدا يذوب قصري عليها :)

بعدين حطي عليه ظرف كريمة وحركيها لما تختلط مع السكر ,, بعدين حطي فوقهم علبة أو علبتين قشطة(( تراني نسيت كم :) من زود الظفارة :) )) وحركي بملعقة خشب :) بس أهم شيء في هالحالة النار تكون هادية خصوصا بعد ماذاب السكر ,,

وبعدين بيطلع لك التوفي ولا أحلى :) واذا طلع معه شوي كتل اشخليها في المشخل :) وارميها في الزبالة ولا يشوفك أحد :) كأنتس مادريتي :)

وابئي سلمي لي على جيرانتس الأرجنتيين :) وأرسلي لهم صحن من حلاتس :)

واذا ماضبط علميني عشان أفزع لتس بطريقة ثانية :)

سلام ياعسل :)[/align]

ههههههههههههههههههههههههههههههه

الله يخلف على اميمتس

قسم بالله انتس مصرقعه

قبل شوي صيحتيني وقامت دموعي تبطبط

يوم قمتي تكلمين عن الرياض ومطرها :(

والحن مت من الضحك على رحلتكم المأسويه :)

تكفين نسخه عاجله لمضيف الفله :)