ليه ذبلانه ونظراتك حزينـــــــه

.
.
.
ليه ذبلانه ونظراتك حزينـــــــه
وانتِ أجمل من تبسّم فالمرايه
يا عويد البان غصن الياسمينه
في حشاك الجرح كنه في حشايه
أودعك من لا تنام الليل عينه
واحرسك بالله من اعيون الوشايه
واقف جنبك وروحي لك رهينه
والوعد قدّام والايام جايــــــــــه
اعتبرني بحر واعتبرك سفينــه
وان تعرّضك الخطر خلّك ورايه
والعدو يسقط سلاحه من يمينه
لو يشد القوس ويجيد الرمايه
عندي انتِ درّة العقد الثمينه
والاوادم كل يقديه رايـــــــــــــه
يفهق الخصله بكفه عن جبينه
ويجذب أحلام الطفوله بالهواية
فيه طهر ونيته للكل زينــــــه
والبشر حوله لها غايه وغايـــــــه
وذي تبرر لوعة القلب وحنينه
حبي وخوفي عليها فالنهايــــه
الطبايع قرّبت بيني وبينـــــــــه
لين صار الحب من نوع الوصايــــه
خايف يوذا وهو باول سنينـــــه
وانفجع عليه وتبين الحكايــــــــه
رجل وش كبري وسن العقل وينه
غلطتي تحسب ويفضحني بكايه
اطلب الله رب مكه والمدينه
واحد دون الملا فيه الكفايـه
يحفظه لي ويحيطه بالسكينه
هو رجاي الله لا يقطع رجايه
-
#شعر// @KhaledBaqmi
الشاعر// خالد البقمي





.