در بالك يدري احد ( مشارك بالمسابقه )
[c]
در بالك يدري احد
الموضوع خطير
هذه احد اجتماعاتنا الخطيره لتدمير الولايات المتحده المريكانيه
من زمان وانا خويي الكوبرا واخوي الكبير نفكر وشلون ندمّر امريكا ( فابشر بطول العمر يابوشو ) بالعربي الفصيح حنا ارهابيين ( اويري ) .
واليوم بدينا ناصل للخطوط النهائيه لتدمير مريكا واللي بحول اللي ما تنام عينه مدمرينه مدمرينه .
اول ما فكرنا بمشروعنا العظيم قلت للشباب ( حيث اني العقل المدبر زي ما تقولون ابو شيبه الشله ) حنا ما نقوى لمريكا وجه لوجه اغسلوا يديكم من هذي , لكن نبي نبدا باضعاف مريكا من الداخل وبكذا تنقسم مريكا قسمين ( اقهرك باللي خلقك ) فأول شئ نبي نسويه اننا نحرك النيقرو ( خوال مريكا ) حيث ان مريكا مضطهدهم بالحيل , ياما يقبسون بوجه بوش ويقولون اسمع ياولد برباره ياما تخلينا نحكم مريكا زينا زيك ولا ترنا مستقلين الله لا يعوق بشر واكيد ان بوش الوغد يبي يعيي وبكذا يقبون الخوال ويخلون عاليها واطيها ويسوون حكومة معارضه اما بالمكسيك او حدى الدول اللي حولهم وحنا يالشله نبي ندعم الخوال ياما يسوون دولتهم المستقله لانهم مساكين ماحد معطيهم وجه هناك . ايـــــــــــه ولا منهم سوو الدوله تبي تناشب معهم مريكا وتلتهي بهم وتخلينا بحالنا .
قام خويي الكوبرا وقال افرض ان الخوال خذو الحكم هناك .
قلت احلا و احلوين
قال الشرهه علي اللي اماشيك ياوجه الذلول ( قايلكم من زمان ترا الكوبرا ما يعرف يسولف بس ما صدقتوا )
قلت اها ياوجه الفنجال المثلوم
قال يا بو الفلحي من جدك تبي الزنوج يحكمون مريكا , ياخي افرض جتهم ام العبيد وضربونا بنووي
بصراحه انا ما فكرت بهالناحيه ولا همتن مره , مار اللي هامن ومنغص علي عيشتي ولا هاليوم ما لقيت له جواب , هو وشلون الكوبرا جاب هالنقطه الحساسه مع انه ما عنده ما عند جدتي شمّا .
قام اخوي الكبير قال اتركوا مريكا علي انا لكن من يتزهل لي ببريطانيا وهو ينقز الكوبرا قال انا له وانا اخو لوسي |513|
قلت هاه وش عندك ياتشرشل
قال خل عنك بس مالكم الا اللي يلعن ثواهم الثوى وانا لا قلت قولي عن افعال ( كان مشروع شاعر بس انه اتجه للسياسه ياعل يوم الكوبرا قبل يومه )
وهو يتنهض من عندنا قال اسمعوا انا ابدق على بوش الشايب بالتلفون واقول له تر ولدك سهران مع شباب والله العالم انهم يتتنون وبنفس الوقت ابدق على بوش الوغد واقول له شف ابوك قام يقط خيط وخيط بشوارع واشنطن .
وليا منه طلع من البيت ابكلم برباره واقول له الحقي رجلك تريه مهو بعيدن عن كلينتون .
قلت ايه وبعدين:eek:
قال الكوبرا ياااااااخي خله يكمّل :mad:
قال اخوي اصبروا باقي له لحايق , وليا منهم تواجهوا بالمكان اللي انا محدد لهم ابجيب السي ان ان والبي بي سي وغصب واحد ( ياشين الظلم ) واخليهم يصورون العايلة المصونه وهم يتخانقون بالشارع .
وزود على كذا ابطلع صورتهم بالاقتصاديه حقت امريكا :rolleyes:
واكتب تحت الصوره شوفوا شيوخكم ياعيال اللذينا .
جازت لنا فكرة اخوي الكبير وحنا ندق على تسع ميه وخمسه حقتهم نبي رقم بوش الوغد والشايب :D
وكل ما دقينا عليهم طلع لنا ان جميع المعاميل مشغولون الان فضلا اتصل لاحقا وشكرا ( الظاهر انهم داقينه بوكر :rolleyes: )
وكل ما دقينا قام يتفلسف المعاميل المعاميل وهو يزعل اخوي الكبير و يتصل على وزير اتصالات مريكا
قال عسى مهن معاميل الضلماوي هاللي كل ما نتصل قال معاميلنا مشغولين . نعنبوا بليسكم يمديهن طبخن وبهرتوهن بعد .
قال الوزير المعذره يالبناخي , وترن متفشل من عملهم لكن والله وامان الله ان مالك الا طيبة الخاطر بس انت وش تبي .
اسفهل اخوي وقال ابي رقم بوش الشايب والوغد
قال خير عسى ما شر ويتراعد ( لا تقولون وش دراك , السلك كان يهتز )
قال اخوي بس ابي انشده عن قصيده !
شك الوزير وهو قبل خايف يحسب ان اخوي يبي يشتكي عليهم , وقال ما انطيك اياه الا ياما تعلمن ( شفاي مسبوع الابو )
ويقوم اخوي ويصك السماعه كسحتن له ويبي يمغر كبده .
وبكذا خربت خطة اخوي والسبب اتصالاتهم الله لا يوفقه .
لكن باقي لنا اجتماعات
ستكون المضايف
صاحبة السبق
وتبون تشوفون فوق كل اجتماع
Exclusive al Madhayef
-----------
تـــــــحــــــــــيـــــــــاتـــــــي
اخــــــــــوكــــــــــــــم
فلـــــيـــــــحـــــان
الارهـــــابــي
[/c]
