إلا القليل

.
.
.

هاجرت يامعاوين الدهر وهجرت
ورحلت وانفجار الصمت يوم الرحيل

آه ياليتها قبل الرحيل صبرت
لين تاخذ على يدها وصاة القتيل

ليتها قبل ترحل عاهدت ونذرت
للقا لو تقفاه الزمان الطويل

ليتها حاولت لو انها ماقدرت
لاجل اقول ان هذا ظرف ماله بديل

لكن المشكلة في بالها ماطرت
كلمة تجبر الخاطر وتبرد غليل

يوم حل السفر حان القدر وغدرت
والنسا مابهن من صافي الا القليل

فارقتني بصمت وكنها مادرت
عن جروح دواهن بعدها مستحيل

قدر الله مقادير الزمان وجرت
اني اصير من عقب السعادة عليل

المشاعر حزينه والعيون سهرت
والوطن في عيوني كل مافيه ليل

تظهر الشمس لكن وش بعد لا ظهرت
ماتنور دروب اللي بليا دليل

يانجوم تقفاها النسيم وسرت
دوري لي على دار السعاده سبيل

ضايق البال سند دمعته وحدرت
مثل سيل من العالي نزل للمسيل

عبرة كل ماحل الظلام عبرت
شايل همها مع جور وقت هميل

حالتي عقبها من سقمها مابرت
مير انا طالبك يالله صبر جميل
-
.
#شعر
جوهر غالب الحربي - الكويت

.