عشر نصايح. #شعر

.
.
.

بسم الولي مبداي علام الاسرار
الواحد اللي جملة الخلق ترجيه

عشر نصايح لك نظمتها بالاشعار
ياللي جميل القول تسمع وتوحيه

انصح بها نفسي وللغير تذكار
اذكره ان كان به شي ناسيه

الأولة حافظ على الدين باصرار
وفرض الصلاة اليا وجب لا تخليه

الدين بامر اللّه نجاتك من النار
ودرب الطمأنينة ابدينك تلاقيه

والثانية والدك خلك معه بار
ومن يرضي الوالد رضي عنه واليه

والثالثة لا يجزعك شين الاقدار
حيث القدر رب المخاليق يجريه

والرابعة اغفر ترى الله غفار
وربك يحب العفو ويحب راعيه

والخامسة جارك ولو هو معك جار
واجب تودّه واجب انك تراعيه

والسادسة ضيفك اليا شرف الدار
اطلق احجاجك له ورحّب وحيّيه

والسابعة لا تجلس الا مع أخيار
واحذر جليس السو احذر تخاويه

لو هو ضحك سنه ترى القلب مكّار
لا يخدعك وابعد عنه لا تماشيه

والثامنة اياك تغضب وتنهار
ترى الغضب ملزوم تندم بتاليه

والتاسعة خلك حليمٍ وصبّار
ويا سعد من كان الصبر خصلةٍ فيه

والعاشرة وعدك ولو تخلفه عار
الحر وعده دين لا بد يوفيه

تمت وصلوا عد ما طيرها طار
على الذي لا شك ماحدٍ يماريه

-

.

#شعر
منصور بن عبداللّه المجيدل
.
.