يا دار وين اللي بك العام كاليوم
يـا دار ويـن اللـي بـك العـام كاليـوم
ما تقل مـرك عقـب خبـري نجوعـي
خالـي جنابـك بـس يلعـي بـك البـوم
ماكن وقـف بـك مـن النـاس دوعـي
شفت الرسول وصار بالقلـب مثلـوم
وهلت مـن العبـرة غرايـب دموعـي
وين الجهـام اللـي بـك العـام مـردوم
وظعـون مـع قـدرة سلفهـا تـزوعـي
أهـل الـربـاع مزبـنـة كــل مضـيـوم
واهـل الرمـاح مظافريـن الـدروعـي
راحـوا لنـا عـدوان وحنـا لهـم قــوم
ولا ظنتـي عقـب التفـرق رجـوعـي
وان صاح صياحن من الضد مزحوم
تجـيـك دقـــلات السـبـايـا فـزوعــي
صفـرن يكاظمـن الأعنـه بـهـن زوم
يخـلـن سـكـران المجانـيـن يـوعــي
يركـب عليهـن باللقـى كـل شغـمـوم
فريـس والله مــا تـهـاب الجمـوعـي
خيالهـم ينـطـح مــن الخـيـل حثـلـوم
يــوم الاسـنـه بالنشـامـى شـروعـي
ويا شيخ انا عندك معـزز ومحشـوم
ويمضـي علـي العـام كنـه سبـوعـي
لا شـك قلبـي بالوفـا صــار مـاسـوم
لربعي ونا يـا شيـخ منهـم جزوعـي
وعيني لشوف الحيف ما تقبل النوم
والقلب يجزع بين هـدف الضلوعـي
ويا شيخ ابا وصفك يا مفنـي الكـوم
يالصاطـي القطـاع حسـن الطبوعـي
حليـاك حــر يفـنـي الصـيـد ملـحـوم
متفـهـق الجـنـحـان حـــر قـطـوعـي
حـر علـم بالصيـد مـن غيـر تعـلـوم
يـودع بـداد الريـش شـت مـزوعـي
