شمر هلا الطولات وبليس ملعون
(شمر هل الطولات وابليس ملعون
والشاهد الله والعبي يا حمامة)
بيت ٍ وغنيته مع اللي يغنّون
وحطيته براس القصيدة علامة
شمّر هل الطولات يعني يطولون
اعلا بروج المرجلة والزعامة
شمّر وبهجة خاطري يوم يطرون
وبشاشة بيوت القصيد ووسامه
شمّر طنا .. نخوة .. شجاعة .. كرم .. عون
شمّر رحابة صدر .. شمّر شهامة
شمّر كبار صحون .. وسّاعة طعون
اهل العطايا .. محتمين الجهامة
يوم الكرم فيه القبايل يمارون
شمّر هم ملوكه وذروة سنامة
كن الكرم بأسم السناعيس مقرون
لا قال من شمّر ذكرت الكرامة
سمعت يوم الجوع مبطي .. يقولون
طعام جار الشمري من طعامه
ويوم الغزو والوضع ماهوب هاللون
اكبر غنايم من غزوه السلامة
قوم ٍ لهم بالمجد اساسات وركون
من خلقت الدنيا ليوم القيامة
والله وسبع انعام لو مايكفّون
خطوا الزّحول معاديين الرخامة
احبهم في ذمتي حب مجنون
والله يلعن من كذب في كلامه
ياطير خذ هذي لحايل وممنون
مع خافق الشاعر وغالي سلامه
قل قالها من قلب وابليس ملعون
مدح ٍ بشمّر .. والعبي ياحمامة
