وا وجودي وجد من جلي عن دياره مجنـا
تو عمــره عشر واربع والليالي مـا تحنـه
ما وراه إلا عجـــوزٍ واختـه وعـود مسنـا
بين فقر وبين دين وبين ضيم وبيـن منـه
ما ذبحهم غيــر دمــع من الغبينه مـا يكنـا
ويل من ســود الليالـي بالمصــايـب يبتلنـه
راح مثل الذيب وهبلته حياة الــذيـب ظنـا
وآمن والموت يومه بين مخــلابـه وسنـه
راح ينقل دم قلبه وان ضـــواه الليـل ونـا
الذيابـه مروحـــاتـه والسيـــوف يدورونـه
ليا ذكر دم القـــرايب عـــانـق البيـدا وثنـا
وان تذكر ضحكة امه زاغ قلبه مـن مغنـه
ما يلوعه في حشاه إلا ليا شاف البرق سنا
غاب عشـر اسنين ما به من يرد العلم عنه
ان حداه الخــوف منــا هزت الأشـواق منـا
يوم طــال الـــوقت عود للديـار اللـي ربنـه
قــــال مـــا دام المـــذلـه والبـــلاوي يبتلنـا
والله ان الموت في الأوطان بين الربع جنه
يوم وقف في المنــازل ما لقـــى بيـــت مبنـا
غيـــر بيــــت للهــبـــايـب والـذواري يلعبنـه
راح يمـــه كنه اللـــي ضــاربـه رمـح مطنـا
وعـــذابه مــا دري ان اسهوم بقعـا يحترنـه
يوم قـــرب سمع له صوت من العلـه يحنـا
حصل امــه عندها ضيف يقول الموت سنـة
قال يمه قـــالت عيـــوني مـن الدمـع انعمنـا
قال ابويه قالت اطــوال النصـــايب قد خذنـه
قال واختي قالت اقفى القوم باختك مع ظعنا
قال ربعــــي قـــالت اسنيـن المجاعـة فرقنـه
قال جيتك قالت ان الموت مـا ظنـي تـــونـا
واستلمها نازع الارواح روحـن مـــرجهنـه
ثم صاح من التفرق صيحة اللـــي فيه جنـا
دق صدره وانطوى من حر ما به طي شنه
كل هذا حــال قلـب مـن خلقـــه الله مــعنــا
الهمـوم يـــوكلنـه والــــروابـع يـــــوكلـنـه
ليه ادور للسبـــايب والسبـب فـــينـا ومنـا
النفوس وما تسوي واليدين ومـا حصدنـا
لا تسودنا الخطايا نلحـق الشــرهـه زمنـا
ما جزانـا إلا عملنـا والخــــلائـق يثبتنـه
http://www.youtube.com/watch?v=IO4fu...eature=related