اروع ما قرأت

السلام عليكم ورحمة الله وبركاتة




يالله وانا طالبك تغفـر لـي ذنوبـي يـا غفـور

ارجيك والجا لك وانـا سالـك واعيـد المسألـه

لوما تطهرنـي بعفـوك مـا تطهرنـي البحـور

جيتـك وذنبـي قـد تعـلاّ غاربـي يـا مثقلـه

أنا من الطين انخلقت , أخطي ولانيـب معـذور

قامت علـي الحجّـه بدعـوة رسلـك المرسلـه

مؤمن بتوراتـك و إنجيلـك و مؤمـن بالزبـور

و بسنّـة محمـد وآيـات الكـتـاب المنـزلـه

لكن خُدعت بزخـرف الدنيـا وزادتنـي غـرور

أبدت مفاتنهـا و ورتنـي مـن العمـر اجملـه

طبعاً بما إني بنـي آدم حصـل منّـي قصـور

واذنبت يـا مـولاي ذنـبٍ بالخفـا مـا تجهلـه

أسألك تغفر لي و تستـر موقفـي يـوم النشـور

اليا القفـت خلقـك صحايفهـا وهـي مستذهلـه

من يستلمها بالشمال افلـس وهـو يدعـو ثبـور

ومـن يستلمهـا باليميـن افلـح لخيـر المنزلـه

واسألك يا ربـي تعاونّـي علـى نيـل الأجـور

أحيا حيـاةٍ مكسبـي فيهـا مـن البـر افضلـه

واسألك جاهٍ مع هـل الدنيـا وحـظٍ مـا يبـور

أيضاً وعرفٍ مـع هـل الحكمـه ورزقٍ تكفلـه

من لا تهيّـا لـه مقـامٍ مـع طويليـن الشبـور

يبكي على ما ضاع من عمـره وخيبـات عملـه

وان شاب راسه لا ترجّى فيـه تجبيـر الكسـور

لا خير فـي تالـي زمـانٍ مـا تغانمـت اوّلـه

ومانيب ناسي قصةٍ صـارت وانـا ازورالقبـور

لازلـت افكـر فـي غرابتهـا وبالـي تشغلـه

ساعة ظهر لي شايبٍ له حول قرنيـن محجـور

في جوف قبرٍ عن هـل الدنيـا طـواه ويعزلـه

سلّم وجا صوبي يقول : ابنشـدك يللـي تـزور

عن حالة الدنيا وعن وضع الزمـان وعـن هلـه

أنا مضى وقتي ومرّت بـي طويـلات الدهـور

والباقـي بعمـري بعيشـه بينكـم واستكمـلـه

قلت : الزمان اللي يبارينا علـى خبـرك يـدور

الوقت نفسـه مـا تغيّـر ماشـيٍ فـي جدولـه

أما البشر , , , لا والله الاّ غير من حـد الجـذور

صار انتقـالٍ مـن يميـن الـى يسـار المنقلـه

استغرب الشايب من اللـي قلـت وبليّـا شعـور

حط اليمين اعلى الشمـال وخاطـره فيـه اسئلـه

قال : افتني عن حالة الشيبـان والشيـخ الوقـور

أهل الخبر والراي والحكمـه وضـرب الأمثلـه

القدوه اصحاب الأمور اللي تطـاع بكـل شـور

اللـي يفضّـون النـزاع ويحكمـون المشكـلـه

قلت : البعض منهم على ما قلت في وصفك وقور

قدوه ولكـن رايهـم مـا ينفـرض فـي مسألـه

الطاعه العميـا بقـا منهـا مجاملـة الحضـور

اللـي تلاقيهـا مـع اوّل فـرصـةٍ متنصّـلـه

والبعض لا عبـدٍ يخـاف الله ولا عبـدٍ شكـور

لا زهّـده شيبـه مـن الدنيـا ولا هـو جمّـلـه

بهيمةٍ يرجـع علـى منحـاه الاوّل ومحصـور

فـي لعـب بيلوتـه وريـح زقارتـه ومعسّلـه

والبعض الآخر شابت رموشه على درب الفجـور

ينقـل جـوازه للسفـر مـن مزبلـه لا مزبلـه

أشيمطٍ زانـي قضـا عمـره بحانـات الخمـور

والعايلـه ورعٍ يغـرّر بـه وبـنـت مهمّـلـه

قال : افتني عن حالة الخفرات ربّـات الخـدور

اللـي تصـان ببيـت عايلهـا و بابـه تقفـلـه

شيهانةٍ تشمخ عفاف وتصقـل فـروخ الصقـور

بين الفريـق ببشتهـا الضافـي وتـوبٍ تسبلـه

قلت : العـذارى فـي زمنّـا ببغـاوات الطيـور

تقليد هرج و عـرض ريـشٍ خلفهـا تستخملـه

تلبس عباةٍ ضيّقت حـول الردايـف والخصـور

فضيحةٍ تكشـف جسدهـا مـن علـوّه لاسفلـه

وموضة شيالٍ تكشف الوجنات والـوان الشعـور

والمحـرم تبـدّل بـجـوالٍ بيـدهـا تحمـلـه

لا فوّحت صفر الدلال ولا عرفت غـش القـدور

تطبـخ لـهـا خـدّامـةٍ بالعايـلـه متوكـلـه

الأم ما صانت عفاف البنت من عمـر الزهـور

والأب ديّـوثٍ تحكـمـه حـرمـةٍ مسترجـلـه

وشلـون يتربّـى عيـال ام التبـرّج والسـفـور

الاّ خنـازيـرٍ دمـاهـا بـــارده ومغـفّـلـه

قال : افتني بحال الشباب الصلب صيّاد النمـور

الفـارس اللـي ينطـح خصومـه بزنـدٍ يفتلـه

الوافي الشهم الغيور اللي لعـرض الجـار سـور

البار عنـد امّـه وابـوه وعلـم ربعـه يشغلـه

قلت : الشباب بوقتنا وجهه مثـل بـدر البـدور

والجسم من زود الرخا ما تنفتـل فيـه عضلـه

قصّـة شعـورٍ صيّرتهـم لا إنـاث ولا ذكـور

والثـوب راح ولا بقـى الاّ عـالـمٍ متبنطـلـه

ناسٍ ( فلنتينو ) وناسٍ تلبـس ( كرستانديـور )

صـار التنافـس بينهـم فـي لبسهـم والجنتلـه

من كان يشرب من قرار البير مشروبه ( بيور )

والبل راعيها غـدا يشـرب حليـب ( النستلـه )

مامنهم اللي قام دون اعـراض جيرانـه غيـور

من قام قالو , , وشملقّـف حضرتـه ؟ وشدخّلـه

والوالدين حقوقهم ضاعـت وعنهـم فـي نفـور

ان غـاب عنهـم لا تذكرهـم ولا جـاه الولـه

بدّا عليهم شلّـةٍ تهـوى الوطـا بيـن الجحـور

لو تعزله عنهـم تبـي لـه شـان كنّـك تقتلـه

ما راح يوم يشارك ربوعه بحـزن ولا سـرور

حتى ابن عمّه يعرفـه بالوجـه واسمـه يجهلـه

بدّل حكاه وضيّـع سلومـه وحالـه فـي دبـور

وان شاف ضيف يخش حتى انّه يفـارق منزلـه

ناظر لي الشايب بعيـنٍ تجمـع السبـع البحـور

يقول : انا لا يمكـن ادخـل مجتمعكـم واقبلـه

انتو لكم وقتٍ تصـدّع مـن بلاويـه الصخـور

ما يقعد الجمّال به ساعـه ولـو ضـاع جملـه


تحياتي لكم

صح لسان اخوي سعود على النقل
والاختيار والرائع


لك تحياتي

من كان يشرب من قرار البير مشروبه ( بيور )

والبل راعيها غـدا يشـرب حليـب ( النستلـه )


تسلم يمينك والله على هالمنقول الوافي

قصيده حازت ونالت وتكلمت باحوال الناس كلهم

زمن ماتغيّر

لكن هم الناس اللي تغيّرت اطباعهم



سعود تواجدك بالمنقول يشرفني ويسعدني



لاخلى ولا عدم








تُثبّت

خوش قصيدة يالعزوة
جزلة من جزل ولاهنت
لك التحية

من اروع ماقرات والله


صح لسان شاعرها


سعود


عزالله اختيار رااااااايع لاتحرمنا


::

تعرف الشاعر ؟

صح لسان الشاعر



وتسلم يمينك على النقل الرائع


لاهنت سعود

سالم الظفيري - ابو نورة _ ابو فيصل _سلمان _ سلطان


لاهنتوا يا العزوة على ها المرور وها الطلة والف شكر لكم انتم


تحياتي لكم

والشاعر مع الاسف يا سلمان ما اعرفة