لو انت توطى من خويك على النار = خله يروح مكرمٍ ما شتمته
اخذت لي في مبتدى العمر مشوار = ما كنه الا حلم ليلٍ حلمته
ما كني الا ملخصٍ مؤجز اخبار = بنيت ما ادري وش بنيت وهدمته
جينا على الدنيا طروشٍ وزوار = واروح منها محزمي ما حزمته
ألا الفراق ودمعةٍ تخفي أسرار = وجرحٍ بصندوق الضماير كتمته
طرقيتن نمشي مع الدرب عبار = اما لزمك الدرب والا لزمته
نمسي بدار ونصبح الصبح في دار = فهمت والا حكينا ما فهمته
ما دامت الدنيا لوافين الاشبار = وامٍ تموت وطفلها ما فطمته
ما احدٍ خذا منها اليا راح دينار = وانا باروح ومقسمي ماقسمته
دنيا تخلي صاحي العقل يحتار = حتى الحديد تلينه لو لحمته
الحر منها يكسر الحوم لا طار = والذيب نابه ما يوقي الحمته
يا خالد اوصيك بالضيف والجار = وخويك اللي بالمواقف حشمته
لو انت توطى من خويك على النار = خله يروح مكرمٍ ما شتمته
واحرص على خوة بعيدين الانظار = والضيف قوم بواجبه يا عزمته
وابعد عن اللي خوته تجلب العار = ترى الردي ما ينفعك لو زهمته
واحذر عدوك لو ضحك لك بالامرار = لا يخدعك مع طول الايام صمته
والله على المسلم فرض صوم وافطار =وزكاة مالٍ من حلالٍ صرمته
وفرض الصلاة وذكر من جاء بالاذكار = هذا وحج البيت فيما ولمته
سجلت لك في منهج الشعر تذكار = لو ينرسم من دم جوفي رسمته
بينت معناها على أساس وجدار = ونظمتها نظم الخرز لا نظمته
جواهرٍ مثل الذهب بين تجار = والا الشجاع ليا وقفت ونهمته
يالله عفوك عند زوغات الابصار = منك ليا من الكتاب أستلمته
