عين عذاري !!!

حكومتنا الرشيدة والرشد اتى من الحكمة والحكمة اتت من الحكم ولانها رشيدة فهي الحكومة الحاكمة لنا وبيدها امورنا وتصريفها ، اقول حكومتنا الرشيدة ويمكن غالبية حكومات الخليج يمكن ان نطلق عليها مجازاً المثل القائل " عين عذاري تسقي البعيد وتخلي القريب " ..

يعني بسم الله عليهم وعيني عليهم باردة ما يجيهم أحد او يسير الا ويرد لاهله محمل بخياش فلوس " لزوم السياسة الخارجية " وما تصير كارثة الله لا يبلانا الا وهم قاطين ارواحهم جدام حتى حكومات الدول التي حلت بها تلك الكارثة ليقدموا المساعدات لهم " تراني مو معترض " جميل ان نفعل ذلك دفعت بلا عنا .. لكن ماهو ليس بجميل ولا نقبله ان تتلقف حكومتنا وتبني مدن نموذجية في دولة ما بينما مواطنيها ينتظرون اكثر من عشرين سنة ليحصلوا على بيت العمر ، او تقوم بعمل مستشفيات مجهزة بينما مرضانا لا يجدون اسرة في بلدهم ، او تبني الجامعات خارجيا بينما طلبتنا يتشرشحون في دول العالم ليكملوا دراستهم ، لا والطامة الكبرى يجلبون العمالة الخارجية بينما ابنائنا عاطلين عن العمل ، كل هذا واكثر تقوم به حكومتنا الرشيدة واذا احد سالها قالوا سياسة خارجية مو شغلكم ، زين مو شغلنا سووا اللي تبون بس خلوا لنا حصة سموها السياسة الداخلية على الاقل احنا منكم وفيكم ..

تصدقون انني اكتشفت ان اغلب ما تقدمه حكومتنا من مساعدات خارجية لم نستفد منها خارجيا والدليل ما حصل لنا ايام الغزو العراقي الغاشم على بلدنا وموقف اغلب الدول التي حضت على تلك المساعدات ..

وتصدقون ان اغلب تلك المساعدات عبارة عن خدمات تقدم من اموال الدولة والشعب لتسهيل مصالح بعض التجار والمتنفذين في تلك الدول يعني بالعربي المشرمح لا سياسية خارجية ولا بطيخ تنفيع بتنفيع على حساب المواطن والوطن ..

اه ياعين عذاري تسقين البعيد وتخلين القريب :za3lan:

قلها بعباره واضحه وسريحه بدون ماتقول انا ماعندي اعتراض
قال ليش الشيوخ يجلدونك قال الشيوخ ابخص هذي سياسه
خارجيه والسياسه الخارجيه دفع بلا عن الوطن والمواطن مثل واحد
ياكل وفيه جيعان مركز النظر على يد اللي ياكل متى ترتفع ومتى تنزل
وصدقني ان العماله لولا الله ثم وجودهم بعض اشغالنا توقف والعماله منفعه
اولا للمواطن وثانيا الايرادات من الاستهلاك الداخلي والتامين على العماله من
جميع الانواع وهذي رفع سقف الدعم وانا اتوقع مافيه مواطن خليجي تصعب عليه
الوظيفه والمسكن اذا هو جاد لكن واحد يبي ينام او يداوم 2 سعتين والدوام8ساعات
لا والساعتين راحن تصفح جرايد ويبي بيت ويبي راتب25000 هذا قله استرح عند اهلك


اعطيك مثال في المملكه العربيه السعوديه
رفع الضمان الاجتماعي حتى المتقاعدين شملهم
زياده رواتب المتقاعدين في الخدمه المدنيه والتامينات
والجميع علاج مجاني لجميع الاسره مهما كان عددهم
وجميع الموظفين يصرف لهم بدل سكن لايقل عن راتبين
وهو يملك بيت من الدوله((الصندوق العقاري))وتقول عين
عذاري وصدقني لو توفر كل اللي نبي كان مانتحرك ولانقوم
اللا بالواسطه ولانتركه كل متطلباتنا على الدوله ونلوم عليها
لابد من المشاركه بين المواطن والدوله على شان تمشي صح
عجله الحياة حتى بالامن المواطن لازم يشارك وهذا من الواجبات

ولك تحيه

هلا أبو جاسم ...


منذ الغزو ... توقفت عين عذاري عن سقيا القريب .... واكتفت بسقيا البعيد ... لزوم السياسة كما ذكرت ... وربما .. خشية غزو آخر !!


نسأل الله الهداية ...

الله يديمك لنا يابو متعب




و بس


------------------
أبو فهد الهمزاني

العطاء مهما كانت اسبابه .. يجب ان لا نقحمه بمشاكل اخري ..

الغالي محمد ..
عطاء اي دوله سواء كانت مساعده انسانيه او ديون , لن ياخذ من حق الفرد بالمجتمع , هذا لو كان بييننا قياس ومنه ندلل

عين عذاري ..
اذا كان المواطن بالفعل هو بحاجه الي لقمه عيش , لكن اذا هو يعيش برفاهيه ليش نقصر بمساعده الدول سواء كانت مساعده
انسانيه او حتي سياسيه ..


..
بوجاسم تري توجهات التكتل البرلماني مو شرط نؤمن بافكرها ,,حتي لو كنا من اعضاءها ..
يجب ان يكون لاراءنا تميز وقول والوسط ,, هناك ردات افعال تأتي من البعض يصرخون ويقولون عين عذاري
وهذا الامر قد يكون لحظي ,,

تقبل ابلغ التحيات لشخصك