كان الذكا في منهجك تخـدع النـاس
يــومــك تـفـاخــر بـالـخــداع وتـبـاهــا
الله يقطـع صحبـتـن مالـهـا ســاس
صحبـة مصالـح لاجــل حـاجـة بنـاهـا
كيف المبادئ يااهـل العـرف تنـداس
صـــارت تـوجـهـا الـمـصـالـح وراهــــا
ماعـاد للصحـبـة مشـاريـه وقـيـاس
عـنـد الــذي هـانـت عـلـيـه ونـسـاهـا
كرهت صحبتهـم مثـل دم الاضـراس
وعلاقـتـي مـعـهـم نـــزل مسـتـواهـا
في حالهم صاروا مثل طابخ الفـاس
الـلـي تظـاهـر بـالـذكـا مـــن غـبـاهـا
افكـارهـم عـنـد المهـمـات تحـتـاس
مــع قـلـة الافـعــال كـثــرة احـكـاهـا
اتعب على اللي صحبته ترفع الراس
دنـيـا وديـــن وعـــز نـفـسـه رضـاهــا
يذهلـك الالـبـاب ويحـبـس الانـفـاس
نفسـه رفعهـا ماخـضـع فــي هـواهـا
تـرى المواقـف فالمواجيـب نومـاس
مـواقـفـن يـفــرح لـهــا مـــن لـقـاهـا
انــا بلـيـت بقـلـب طـيـب وحـسـاس
فـي وقـت طيـب اقلوبنـا هــو عنـاهـا
بعض البشر لامن غلط قلت لابـاس
يشـفـع لـهـا عـنــد الخـطـايـا غـلاهــا
اصحابنـا اللـي بالوفـا مالهـا اجنـاس
نغـفـر لـهــا الـزلــه ونـدمــح خـطـاهـا
ماني علـى هفـوات الاجـواد بـلاس
نـذكــر محاسـنـهـا ونـنـسـى رداهـــا
بقلوبنـا تسـوى الجواهـر والالـمـاس
نــرفــع مكـانـتـهـا ونـشـكــر وفــاهــا
افعالـهـم تبـقـى مـفـاخـر ونـبــراس
الله لـحـسـنــات الامـــــور ايـهــداهــا
من خلقة الدنيا تـرى النـاس للنـاس
والـكـل بالله فــي مسـاعـي رجـاهــا
