-
يا عزيمة الشر و الشرير
بالخير عليكم أيتها الوجوه الكالحه
أمس راكب مع خوين لي و نفرفر بالحفر
و جاه إتصال من ولد عمه يقول مرنا و خذ لك فنجال مالنا علمن بك
قال لي خويي وش رايك نروح ناخذ لنا فنجال و نكمل فرفرتنا
قلت رايك وهداية الله
رحنا و جلسنا عند الرجال .. و خذينا شوي
الا خويي اللي أنا جاي معه .. جاه إتصال من أهله يبونه ضروري
قال أنا بروح و أجي الحين .. و جلست أنا عند ولد عم خويي
شوي إلا قام معزبنا .. و دخل داخل
و أنا جالس أتقطق بالجوال .. ما إنتبهت الا يوم دخلت علي العجوز
اللي تقل من العصر الجاهلي .. لافة على راسه له عصابة حمراء بطرفه مفتاح
وهي تسلم .. أنا إنصدمت من الموقف
قالت معك تتن !!!!!!!!!
قلت لا
قالت أو ما تبي تعطيني ..!!!!!!!!
وهي تجلس بنص المجلس .. قدامي
أنا دنقت و حطيت حرتي بكاسة الشاي اللي قدامي
شوي ..
الا تقول لي العجوز .. الظاهر القهوة بس لك .. قم صب لي قهوة !!!
و أنا أقوم و أقف على راسه و أصب له قهوة
و هي تقوم تنشدن .. إنت من ولده
إنت ولد عيده ؟ .. قلت لا
قالت ولد نوووره ؟ .. قلت إيه
سكتت .. خذت شوي .. الا تسألن ثاني مره إنت من ولده
قلت .. ولد نوووره .. قالت .. منهي نوووره !!!
عقبه .. نويت أنزل الدلة و أمشي
بس أهلي بعيد .. و ما أعرف أهل البيت .. و مستحي أطلع بدون إذن
و مستحي بعد لا أجلس و عندي هالعجوز
و فجأة
دخل علي معزبنا .. و أبوه
و شافوني و أنا واقف على راس عجوزهم .. و أصب له من فناجيل القهوة
المساكين .. طات وجيههم .. و أنا دور وجهي ما تلقاه
و ياخذ الولد جدته و يدخله داخل .. و يجلس عندي الشايب
قال .. ترى عجوزنا خرفانه
قلت .. لا عادي ... هي مثل جدتي
و باين اللي طايحة وجههم .. أنا وياهم
و جانا خويي اللي أنا جاي معه بالسيارة .. من جلس و أنا أرسل له نبي نمشي
مشينا و قلت له السالفه .. و جلس يضحك
شوي الا ولد عمه اللي عزمنا .. يدق عليه و يعتذر
يقول .. و الله إننا طاحت وجيهنا من الشمري
عاد يا الربع
إنتبهوا قبل لا تسيرون .. تأكدوا إن ما فيه عجوز خرفانه بالبيت
و اذا بغيتوا تعزمون أحد .. تأكدوا إن جميع المنافذ للمجلس مقفله
برب .. و برب غير طوووووويل
-
هو منين هو اللي يقول اعتذر لي من الشمري لا يكون من الربع ههههههههههه
:
والله موقف ما تحسد عليه يا حنشوووولي
-
هههههههههههههههه
فارس .. وصلت خير
-
هههههههههههههههههههههههه
والله اني دآري ههههههههه
ترى عآدي >> عاش مرقع ههههههههه
-
حنشل صدقن ان العجووز سرره بالمفتاح الي بشيلته <<يازين من شلحوو
عزيمه لالايحسد عليهاا
لي باك
-
أم الرغفان
المفتاح هذا مثل ختم الجودة .. يعني ماركة مسجلة للعجز
و الله من الدفين بالصندوق
بإنتظار عودتك
-
هالحظ الحلو على طول ملابطك / مشابطك
ولو مره ما عمره تسنّع
ما ادري المقرود منهو خويك والا انت ؟:)
اقول .. ما ودّك تدهفه يمنا بالشرقيه ؟
الراسي
-
أبو سلطان
إنت تشوف الحظ اللي ناكسن للمرح
و الدهقه نبي ندهقه
بس عقب ما توقع تعهد خطي ............. إن ما عندكم أو حولكم عجوز خرفانه
<< صارت به خرعه
-
ليه ماعطيته تتن
الحنشل الغالي يوم قالت لك عندك تتن وش قلت بنفسك
اكيد وشبلاه العجوز او قلت هذه خرفانه
احراج
احراج
احراج
للمعزب
لو يدري انك تفل السبحه بالمضايف تسان ذابحك هههه
-
وش أقول يا ابو ضاري .. وش أقول
و الله إني تقل بحلم ......... مدري وش سويت
الدخان قدامي و حطيته بمخباي و قلت لا
و بعدين ................... وشلون أعطيه
يا خوي أنا يا الله أتحمل ذنبي
تبيني أحمل ذنب غيري .. و مهو أي غير
عجوز ... و خرفانه ... و من جماعة الرجال .. و مرفوع عنه القلم
