نــــهــــــج الرجـــاااااااااااااال / للشاعر سعيد الحمومي
على نهج الرجال الي تبرهن بالافعال اقوال
سبق فعلي فعل فمي قبل ينطق باقواله
وترى لاخير في رجل ٍ يقول ومافعل ماقال
مدام ان الرجل فينا رصيده جملة افعاله
وانا ماني من الي قال وقال وضيع الافعال
وضاع وكذب وصدق كلامه وزين اعماله
انا رجل ٍ على قد الكلام وموقفي رجال
بوقت ٍ للاسف كثرة حريمه وقلة رجاله
قنوع ٍ بالقدر ماهز كياني حاقدٍ له فال
وانا مؤمن بحكم الله وفال الله ولا فاله
عزيز ٍ لو اعوز المال كفتني هالقناعه اموال
كريم ٍ ما بخل جيبي على كف ٍ من امواله
صبور ٍ احمل همومي على متن الحياة جبال
طموح ٍ لو رقيت ارقى من طموحي سوى جباله
وماجيت امتدح نفسي ولكن المعاني جزال
وشعري ضمت ابياته بديع الحرف وجزاله
كتبت الشعر في بالي قصايد ماخطرت عالبال
وغيري لو كتب بيت ٍ على بالي قبل باله
بنات الشعر لو جنّي هواجيس وقصيد خيال
كتبت الشعر في نوره شعور ٍ يرسم خياله
صهيل الخيل لو يدوي يدوّر ف الورق خيّال
رسمت الشعر ف اوراقي حصان وصرت خيّاله
من بشوت الكرم والعز وغتره يعتليها اعقال
من النخوه وفزعة قرم يجيلك حامل عقاله
من اهلا فيك حيابك وضيف ٍ نوقد لّه دلال
من البيداء وكيف البن وهيل ٍ فاحت دلاله
من اشرب تم ماتنشد قبل لاتطرح الفنجال
وقبل انه حلا هيله يلامس قاع فنجاله
نعم حنا البدو ابشر عطاء من كفنا دلال
على ناس ٍ لفعل الجود والاحسان دلاله
نعم بدو ٍ وحن ناس ٍ ثقال ٍ والعقول ثقال
نشيل العبء عن كتف الزمن ونوّخ اثقاله
محّن نعبدك يادنيا دنيه ونرتجيك وصال
نطرّد الموت بانفسنا ونشرب سكرت وصاله
حلات الروح لاراحت لبارئها بكل جلال
وقبل تروح ختمتها بذكر الله وجلاله
عبدنا الله ومازلنا عبيد ٍ نعبده بالحال
ونشهد له بأنه (هو) مغيره رب بالحاله
ملكنا عزة النفس وكرمنا يُضرب به امثال
رحمه الله كرم حاتم وقتنا ضج بمثاله
محنا نمد يمنانا عشان انظمها بريال
ولا فينها رجل يقهر يديّ محروم برياله
عوايدنا مثل ماهي ودومه حالنا ف العال
ولا كنا ابد يوم ٍ على قول الحضر عاله
بدو نفخر بها كلمه تمثلنا اذا تنقال
ولاتأثر بنا النغزه وقول افواه قوّاله
ولو وجه الزمان الصلف تغير وانتحل اشكال
بدو نبقى ولاهنا وماهانت سوى اشكاله
رعاه الله لاقالوا بدوي ٍ روض الاهوال
واذا شطت شياطينه من الي يروض اهواله؟!
فديته لا فزع كن ف يمينه مبطل الابطال
يجندل من يُجندل جندلة جنديل لأبطاله
مشى مازال هو يمشي على درب الحياه وان طال
يبي ياصل (يبي ياصل) نهاية درب ماطاله
ويبني في زمان اليأس على قد الطموح امال
(يعلل نفسه ب (عسى) يحقق بعض اماله)
تفضل واختبر حدة ذكائه في الحياه بسؤال
جواب الشعر هو كافي جوابٍ يفحم سؤاله
هي الدنيا مثل ماهي تجيلك كل يوم بحال
بيوم ٍ حالته تشرح ويوم ٍ حالته حاله
دوام الحال مايبقى مدام ان الخلود محال
(وانك ميت ٌ وانهم ميتون) لا محاله
تموت الناس من فوق الرمال وتندفن برمال
ويبلى عظمها القاسي لفتات ٍ يحظن رماله
قصيدي فلسفة فكري اصوغه صوغ بسترسال
وبلّور محور الفكره لشعر ٍ طاب لي رساله
لان الشعر في وصفه رساله في يديّ مرسال
تجسد فكرة الشاعر وفن النثر برساله
ابدري يازمان الفقر وحظ ٍ عاثر ٍ مازال
حشى مابه حصى به خير ف دربي غير مازاله
عن الغايه وتبرير الوسيله ف مجمل الاحوال
وسعي المرء للقمه معا تحويل ف حواله
وش المغزى من الحكمه اذا لك حيلة ٌ فحتال
هو يعني عالم الثروه يعج بناس محتاله؟!
