كلام حجازي ( بالبلدي الفصيح ) حار يا فول
الشيخ محارش
هدي مشاركة بكلام حجازي
ادا ما فهمت كلمة منها اتصل على 999
حار يا فول
من يوم ما خلصت الاختبارات وطلعت النتائج وبنتي فتو وامها جابولي الجنان شحتفوني شحتفه كل يوم والتاني وهما يهرجوني فين حتدوينا فين ح تخرجنا طفشنا من قعدة البيت نبغى ننزل نشم شويه هوا وانا اقولهم حاضر, طيب, بكره, بعده الين ما رفعتلهم الضغط والسكر وفي يوم وانا راجع من الدوام ودخل البيت الا وهادولا واقفين عند باب الشقة ولابسين العبي وشايلين في اياديهم قدور الغدا قلت لام فتو ايش الهرجة. قالتلي لا هرجة ولا درجة اليوم لازم نخرج ودحين.
كده حار يافول??.. ايوه حار يافول!!.
حاضر امرنا لله حكم القوي على الضعيف وركبنا السيارة ودقيت سلف وانا ماشي في شارع من الشوارع وقفت عند اشارة مرور جابتلي الضغط كل شويه وهيه مولعة حمراء حتى سيارة والا سيارتين ما يعدوا من كتر النور الاحمر شغال وبعدين يجي يقولك ليش تقطع الاشارة.. طيب صلحوها لاجل الله وبعدين هيه جات على الاشارة دي اغلب اشارات المرو في جدة بالشكل ده وخاصة عند التقاطعات.
المهم قلت لام فتو فين تبغوا تروحوا الملاهي اللي عندهم الدقيقة بـ 3 ريال وهادا اقل شيء والا ادفع 1000 ريال في استراحة ليوم واحد.
لا نبغى ملاهي ولا استراحة ودينا الحمراء القديمة اللي قدام شركة الكهرباء منها نشوف البحر ومنها فتو تلعب بالمراجيح اللي محطوطة على البطحاء وكانت الزحمة في هاداك اليوم كتيره رجال وحريم وبنات واولاد المهم وصلنا للمكان المطلوب وفرشت الفرشة ودقيت هاديك الغدوة وبعد شويه جات فتو وقالتلي وديني عند المراجيح ووديتها وعينك ما تشوف الا النور (5) راجيح بالعدد وزحليقة واحدة مصدية ومعدومة وحالتها بالبلى والبزور عليها زي الدود كانوا زودوها شويه ما يعرفوا انه هادي الايام ايام اجازة والا لازم يدفعوا فلوس عشان يلعبوا والشيء التاني هادولا البزورة اللي بيستأجروا الدبابات الصغيرة ابو اربعة عجل رايحين جايين على العالم الا قاعدين جنب البحر ور... ور.. الين غبروا على الاوادم من كتر ما يفحطوا بهادي الدبابات والا هادولا الناس اللي بيأجروا الجمال والا هادا الحصان الصغير اللي يقولوا عليه (سيسي) بيركبوا الاطفال معاهم والله عالم كيف حال هادي الحيوانات هي طيبة وسليمةوالا مريضة ومعدية ومين اللي سمح لهم انهم يزاولوا هادي الاعمال? فين الرقابة عليهم? هادا كوم واللي اقوله كما ن كوم تاني لما ادن المغرب رحت ابغى اتوضأ في حمامات المسجد الله يكرمكم والا واشوفلك العالم ماسكة سرا لانه ما كان فيه الا ثلاثة حمامات بالعدد كانوا زودوها شويه ماهم عارفين انه نحنا في ايام اجازة وبعدين اش فيها لما يعملوا كم دور مياه في الاماكن دي المهم بعد الصلاة قعدت ادور على ام فتو الين لاقيتها قاعدة تلم كم حصوه من الحصى اللي موجودة هناك قلتلها ايش قاعدة تسوي.
قالتلي الم كم حجرة عشان العب انا وبني فتو (زقطة وبربر) احسن من وجع الراس والغلب هادا!!!
اخوكم الحربي
منقول من جريدة عكاظ يوم السبت 11/4/1432 هـ للكاتب فتحي حلواني
