قصيدة الفخر بالأنتساب لشمر
السلام عليكم جميعا:
شكرا لهذه الحفاوه والترحيب اللي قابلتوني فيه, شكرا اهل المضيف العام اللي احتضن اول مشاركه، شكرا ابو يزيد على الفزعه ولاشلت يمينك، شكرا لكم جميعا وهذا مهو بمستغرب على عيال شمر.....
في ليله مباركه قبل حوالي عشر سنوات اقيمت حفله حضرها جمع من شيوخ شمر اقيمت في احد صالات الأحتفال بحايل بمناسبة سماح احد العوايل وتنازلهم عن حق الدم ودعي لها جميع من تنازلوا عن حق الدم من شمر وجمع م شعراء شمر "لا اتذكر التفاصيل" وقد كانت هذه القصيده هي اروع ماسمعت في ذلك المجلس بل من اروع ماسمعت الى الآن...لااعرف من الشاعر ولكن حسب العلم انه اتى من الجزيره في العراق لأن عائلة القاتل هم ابناء عمومته ...اليكم القصيده.
يالله يا عالم بخافي حوالها
رافع سماها دون شدة احبالها
بستة ليالي ركز الأرض والسماء
يقدر ولا يعترض ربي قوالها
أودع بها الوديان والرجم والجلد
بعد الجلد نفضنوايب رمالها
وطشر نجوم الكون والثاني القمر
تشوف بالظلمى قديح أشتعالها
وعزل نهاره عن ظلامه بقدرته
وأرسل مليكه ثم رسى جبالها
وأظهر لنا شمس غشى الخلق نورها
وأن اكسفت حال الخلايق بجالها
فضله كبير بس يطلبه الثناء
وحبل الثناء لا ينقطع عن وصالها
ثم(ن) خلق آدم وحواء من الثرى
ونفخ بهم من رو جلت جلالها
وصاروا بجنات النعيم وتوافقوا
عند شجرة شينه منعهم وصالها
وحداهم أبليس اللعين بطريقته
ودهور نفوس مطمئنه بحلالها
وجازاهم الخالق وفرق لشملهم
ومن طاع راي أبليس هذا جزالها
حواء بشرق الأرض وآدم بغربها
وكل قصد للوجه الآخر قبالها
آدم ينام اليل والصبح يرتجي
يبغى يشوفه مار دون أعتالها
وحواء تدوس الصبح واليل بالسرى
من لهفته ما يوجس النوم جالها
وتجلس على كوم البرد في طريقها
وتشكي سموم القيض وعزتالها
وتقابلوا بعد المسافات والعناء
وتعارفوا بالشاهقه من جبالها
وياقادر في ذا تقدر لحيرتي
بشاكيك شرباك العزيزه وحالها
ياسيدي ياهقوتي يامظنتي
يامشتكى عيني ويا مرتكالا
بشاكيك انا يالله من جور وقتنا
دنيا تصفقنا على ما طرالها
والحظ يندبنا وبقعاء تحوفنا
ودنيا تحدتنا وسكر مجالها
لولا الحسد والحقد ما صار وضعنا
مثل فلسطين الذي شفت حالها
بس بكلام الناس تسعى بجهدها
لاأحد وقف معها ولاأحد سعالها
ماجور ياقلب تدهورت بالقهر
عزي لنفس خبث الوقت بالا
قبل أمس وأنا عند ربعي وعزوتي
واليوم بديار(ن) صعيب منالها
وباكر على الدوحه وبعده لغيرها
والله عليم بحالتي وش نوالها
أمشي وانا مالي قرايب على ارضهم
والروح مما شفت قرّب زوالها
ذكرت حكم الله بأول قصيدتي
من هب للقبلي يدير لشمالها
هو داير الأفلاك يقدر يديرها
ويفضي لها كبد زيد اشتعالها
تايه ولالي وطن ياهل الوفاء
لي الولي والروح هي و عمالها
والله لو انه على ما مضى لنا
عند نزلكم حايل لأدني رحالها
واعزي لروحي الغريمه بودكم
واقول روحي مضيعه وش غدالها
مهو ردى فيكم ولا أسب فعلكم
يالعنبو نفس غلاها بمالها
جيته وانا راسي يتزاين به الطنى
ومن سيد كل الناس ماهم ذالها
انا لابتي هم خيرة الخلق والبشر
بعد الصحابه لابتي هم جزالها
زوبع هلي غلبا هل العرف والنقا
شمر خيار القوم شمر ثقالها
شمر هل الردات شمر بوقتهم
شمر على كل القبايل افعالها
ولوهي تعود امجاد شمر وعزنا
شمر على كل الخلايق ظلالها
شمر هل الفوهات شمر هل الخطا
شمر طنايا الطي شمر ثقاها
شمر عفاف العرض شمر هل الخوي
الفكر صخرها ولاأحد قوالها
من غير قاصر بالقبايل وحضرها
منهم مثل شمر على ما مضالها
اذا الناس أرض وهم شمر رجومها
ومهما زموا بالزود شمر جبالها
واذا الناس غيم زام واستنزل البرد
شمر بحر ماضايقه باحتمالها
واذا الناس غيم(ن) زام بالجو وانتهض
شمر نجوم ولا يوصل لمستوالها
والله يا لولا لابتي ضايع الوفاء
ومحمد العوني سبقني وقالها
ويقول فجحان الفراوي بجودهم
منهم مثل شمر رخيص حلالها
أحبهم واحب كل من يحبهم
وأبغض من ابغضهم ولاني بحالها
ويامن يهجعني ويجبر مصيبتي
ويامن يرد النفس ماعرف سؤالها
الأخ /فيصل، حطه بأي مضيف يقراه أكثر عدد من الزوار لأن هذه رائع من الروائع والا وش رايك....ولو تثبتونها تراه افضل...
من يعرف قائلها يدلي بدلوه...ويعطيكم العافيه مقدما...
ودي احط قصيدي بس لما اقرأ للشعار هنا استحي واقول فاز بها غيرك "القصايد"... لكن غديني اتعلم منهم....
هذه غيض من فيضكم في هذا الموقع عساه دايم عمار وعز....
اخوكم/
الأدهم
