-
الطنايا الطنايا
حنّا الطنايا لا طنينا .. طنينا
تشهد لنا حايل وأجا والرعيله
وتشهد بعد كل القبايل علينا
إنّ الطنايا اسم ذيك القبيله
اسم الطنايا تاج فوق الجبينا
تاج ينومس كل راس .. يشيله
تاريخنا وافي لصرحه بنينـا
بافعل ربعي كاسبين النفيله
للشمس مرقاب الطنايا رقينا
في قمته _ في قمته نرتقي له
مثل النجوم الساطعات اعتلينا
ومثل السحاب وكل عينٍ تخيله
يابنت حنّا لازعلنا .. نوينا
ماهي سوالف (ألف ليله وليله)
(شمر) ليا عدو علومه تبينا
أفعالنا بالطيب كلٍ دريلــه
كبار الصحون ونفتخر لاحكينـا
وساع الطعون وفعلنا مايبي له
لاجا نهار؟! بالملاقى رسينا
مثل الجبال الراسيات الثقيله
يابنت حنّا لامشينا كفينـا
والله وكيلك مامشينا بحيله
نزوم لكن لانوينا قوينا
للعز نجم يستخيل ونخيله
عاداتنا_عاداتنا لارتكينا
كل الحمول الكايده نرتكيله
نشوش لامنّه تعزوى .. حدينـا
لاثار عج الخيل كلٍ وخيــله
حنّا مقابيس الوغى لاانتهينا
نار تقابس عند قبس الفتيلة
اليا ركبنا ظهورهن واعتلينا
عيب على اللي مايناطح قبيلة
مثل المزون الناشيات ان مشينا
والاكما سيل تحدر مسيلة
حنا الطنايا لازعلناوزمينا
نزوم زومات البحور الطويلة
واللة نقط اروحنا ماانثنينا
يوم الشدايد والسيوف الصقيلة
نشرب قراح صافي لاضمينا
حتى يبل اكبودنا سلسبيلة
نموت في عز وشرف ماشكينا
لاماشكينا ولابتي ينشكي لة
عاداتنا يابنت لامن غزينا
بسيوفنا نشف القلوب الغليلة
بالدم خضبنا السيوف وكسينا
لجل العيون الناعسات الكحيلة
كم فارس من فوق خيلة رمينا
من هامنا تبكي علية الحليلة
حريبنا يبلش ولا له معينا
إليا وقع بين الصناديد ويله
إليا رفع خشمه لخشمه وطينا
ناطا على خشمه وراسه نزيله
قاسين لاشان اللقا مانلينا
والموت لا منّه دعانا نجيله
بيض النوايا لابتي له وفينا
حنّا الطنايا يالقلوب الهبيله
وخوينا لاصار داله رضينا
حنّا هل الخوه ويكفي دليله
والجار كنّه من حدا والدينا
لو كان يخطي نحتمل جور ميله
ودخيلنا لامن زبنا حمينا
وإليا عوى ذيب الفيافي نعويله
والضيف نذبحله وتشهد يدينا
يكفي كرم حاتم بذبح الأصيله
ويشهد لنا ذيب تعشى السمينا
عشوه ربعي بالسنين البخيله
حنا هل الناموس رحنا وجينا
وأهل الوفا والكيف دله وهيله
وأهل الكرم حنا وياما عطينا
ياماعطينا من العطايا الجزيله
مثل الجبال بطيبنا شامخينا
افعالنا .. يابنت ماينقويله
يابنت حنا لا طنينا طنينا
ماهي سوالف ألف ليله وليله
--------------------------------------
تحياتي للجميع
-
أبو مياسه
الشرف لي أن أكون أول من يرد على هذه المعلقه
ولي عتب
لأن مثل هذه القصيده من حقها أن تكتب بإسم صاحبها
أقصد أبو مياسه من هو ؟؟؟
حتى نتعرف عليه أكثر وأكثر
أخوك
أبو طواله
-
أهلا وسهلا بك أخوب أبو مياسه
قصيده جزله ورائعه
ولكن لا بد من تزويدنا بقائل هذه القصيده
أشكرك جزيل الشكر على هذه القصيده
ولك تحيتي
-
والجار كنّه من حدا والدينا
لو كان يخطي نحتمل جور ميله
ودخيلنا لامن زبنا حمينا
وإليا عوى ذيب الفيافي نعويله
والضيف نذبحله وتشهد يدينا
يكفي كرم حاتم بذبح الأصيله
صح لساااااااااانك ودام إبداعك قصيدة رائعه تحمل معاني أروع في الكرم والطيب ...
تحياتي
شموخ
-
صح لسان الشاعر ولو اني ما اعرفة بس يسلم على هالقصيدة الرائعه وشكرا لك اخوي ابو مياسه على هالنقل الجميل
وتقبل تحياتي
اخوك
عبدالكريم آل عبهول
-
ابو مياسه صح لسانك والله لايهينك
وتسلم يمينك بعد بعدي والله ياسنايدي
-
السلام عليكم ورحمة الله وبركاته
مشكورين على هالردود
ولاكن القصيده اخذتها من احد المواقع ولم اجد اسم قائل القصيده
واسمحو لنا على القصور
ابومياسة الوبيري الشمري
-
السلام عليكم
أبو مياسه
شكرا لك على النقل الموفق نتمنى من يعرف قائلها وضع اسمه
-
صح لسانك يابو مياسه لاهنت على نقل هذه القصيدة الجميله.
