بعض التعريفات الشبابية من القاموس البخيل

إليكم هذه التعريفات التي قد تفيدكم لتتأقلموا مع معطيات العصر الحديث :

المسطل : هو من يرجع اصله لعائلة السطول العريقة واصلها يرجع الى العصور الوسطى وقد اطلق على هذه العائلة هذا الاسم نتيجة لان افرادها يتميزون بالعقول المخرفه والنعسانه وذلك يرجع للتعرفيع بالمواد المسكره والمخدره والعياذ بالله .

المنسم : كل مامريت عليه تسمع صوت سسسسسسسس وذلك يرجع الى تهريب الهواء من رأسه واسبب في ذلك هو ان في راسه فتق لذلك تلقاه دايم يغطس راسه في سطل حتى يرقع التنسيم .


المهوي : مرحلة متأخرة من التنسيم والمهوي وصل لمرحلته المتأخرة جدا بحيث يفقد اهله الرجاء منه .

المسبوه : هو الشخص الذي يكون مروع في صغره لدرجة انه يصبح شبه فاقد للعقل .

الفاهي : هذا الله يخلف على اهله مهما تقول له او تصارخ عليه تلقاه فاتح بلهوثه ( فمه ) وبس ... وإذا كلف عمره وتفاعل معك رد عليك وقالك : هه؟

الحقنة : هو الشخص الغثيث اللي ما يفك لين تعطيه اللي يبيه منك ومهما تسوي له عشان تصرفه عن لموضوع حقه ينشب في حلقك لين يأخذ منك اللي يبيه وقد قال العرب قديما : أغث من حقنة .


العلة : هذا اللي ما تأخذ أنت منه اي شيء ولا عنده استعداد انه يسمع منك مهما حاولت وهو كالمرض يعلك لين تنفقع مرارتك منه .

العربجي : يظن معظم الناس ان العربجي هو الشخص الشديد حق المشاكل واللي ما يمشي الا وهو مشخص ببنت البكار (اسم لطريقة لبس الشماغ عند العرابجه ) وحاط مفاتيحه في سلسلة ولابس نعال زبيرية ويسحبها تسحيب ودايم فاتح صدره ورازه على فوق وكانك ولد ابوك قله شيء بس ... لكن في الآونه الأخيرة ظهرت اشاعاتتقول بان العربجي هو اللي يسوق ال**** (اعزكم الله ) لكن صرح مصدر موثوق من عائلة العرابجة بان هذه اشاعة مغرضة اطلقها عليهم عائلة الخكارية ؟؟؟ .

الخكري : ببساطة الخكري = نعومه +دلع +ليونة .... والله لا يبلانا .

الكحلي : يطلق مسمى الكحلي على ذوي البشرة السمراء ولأن ذوي البشرة البيضاء مساكين ما عندهم لقب احتجوا عند الامم المتحدة مطالبين باللون الفضي ولم يصدر بيان حتى الآن .

المرجوج : هذا ما عمره صلح شيء صح في حياته ما يمديك تفتح فمك إلا وهو طار في العجة بدون ما يفهم وش السالفة والارتجا الحاصل له يختلف تمام عن مشكلة المسبوه حيث يكون الارتجاج هنا نتيجة صدمة وليس نتيجة روعة .

القعيطي : هو الشخص البخيل للغاية ويسمى ايحانا الجلدة وقد نشأة القعيطية على يد القعيطي الأكبر قاعط قعطة المقعط وتبنى نهجه بعده تلميذه تأبط قعطا وقد سمي كذلك لأنه كان يخبئ امواله في إبطه ويقعط عليها بكل عزم وشدة واصرار .

السربوت : هذا اللي ما يخلي مكان مايروح وقد كان الأولين يطلقون لقب السربوت على من يشرب التتن لكن الحين الله يخلف الناس تدخن بيديها ورجليها ولحد يقول لهم شيء .

الداشر : هذا قليل اأدب ولا يحب يماشي إلا السرابيت (جمع سربوت ) وإذا قيل فلان دشر ولد فلان أي خرب أخلاقه لكن ف الأردن الشقيق كلمة دشره يعني أتركه .

الملكع : اما هذا فيعرف حتى السكن ( الجن ) ومقطع السمكة وذيلها ومهما تحاول تلف وتدور معه تراه فاهم وعارف وش تبي بالضبط فلا تتعب نفسك معه.


المصرقع : هو كل شخص ما يهمه شيء واللي يطري على باله بيسويه لأنه ماخ الدعوه سعة صدر وهبال .

المفلت : هو كل شخص ما تقدر انك تأمنه على شيء لأنه ماهوب تكانة ( تروها تفرق عن استكانه للمعلومية ) ويتميز بكل انواع الاهمال والتنيش .


والسلام ختااااااااااااااااااااااااااام