وصلك العلم مـن يمنـا يـا أبـو دلامـة......
هذه المحاورة جرت في منطقة القصيم قبل عدة اشهر بين الشاعرين راشد السحيمي الحربي وسلطان الهاجري :
راشد :
هلا يا مرحبا فـي محـلٍ يرفـع الـراس
محل الحربي اللـي رفـع ربـي مقامـه
بدون قصور بالحاضريـن وباقـي النـاس
علـى مـا قيـل كـلٍ بقـدره واحترامـه
سلطان :
يدوم إلك البقاء ضيفكم طرقـي وعسـاس
سلاحه في يـده والفشـق مالـي حزامـه
تحيزم عن فلسطيـن يـا محمـود عبـاس
ترى ياسـر عرفـات مـا حقـق مرامـه
راشد :
سلاحك مثله سلاح والموضـوع حسـاس
ليـا منـك سلمـت احمـد الله بالسلامـة
اثـر مقياسكـم للعـرب ماهـو بمقيـاس
لعل علومكـم مـا تصـل حـد الكرامـه
سلطان :
سراك من اكة الشيريا وإلا أكـة الهـاص
ترى اللعبة حكم والولـد طـش العمامـة
أنا خابرك وسط البحـر سابـح وغطـاس
لا كنك مختلـف والبحـر تسعيـن قامـه
راشد :
تراها عودت صن .. عندي صن .. لاباس
لا كن سلطـان بالصـن لا يكثـر كلامـه
ليامنـي نزلـت البحـور أطلـع المـاس
لا كـن انتـه غرقـت بغديـرٍ فالثمـامـة
سلطان :
نبا نلعـب مبـاراة واللـي ياخـذ الكـاس
نسلمـه المفاتيـح فـي قصـر اليمـامـة
تدوسون الجمر والجمر ما هـوب ينـداس
الا يـا حـرب هـذا خطـا وإلا غشامـه
راشد :
انا في كل قصـرٍ تعرفـه لـي مجـلاس
مع اصحاب الفضيلة مع اصحاب الفخامـة
ترى النيبـان مفعولهـا قـدام الاضـراس
وروس الناس بالوقت هامـة فـوق هامـة
سلطان :
خدمت الزير وإلا خدمت الشيـخ جسـاس
حسابك عنـد مـولاك فـي يـوم القيامـة
بسيطة لو يغيب القمـر يانـور الاكبـاس
جملنـا لا سـرى الليـل فكينـا خطامـه
راشد :
أثر عندك محطة جديدة وأسمها (( واس ))
يا شايف شي ما شافتـه زرقـاء اليمامـة
ترى يطري لنا لجلكم عشريـن هوجـاس
بعيـرك لا تفـرط بشعـره مـن سنامـه
سلطان :
وعندي سيف وإلى اعتليت اسروج الافراس
يروح الشيـخ قلبـه مثـل قلـب النعامـة
الا ياحرب ياحـرب يـا لباسـة الطـاس
لكم في نجـد يـومٍ مثـل يـوم الرغامـة
راشد :
اخاف تفكر تحوس لـك عالـم وتنحـاس
تحصل لـك علامـة وتفقـد لـك علامـه
ونعـمٍ بالهواجـر ليـا دقـن الاجــراس
شهادة حق مـا عندهـم عـرق الرخامـة
سلطان :
كتبنا لك كتـابٍ حروفـه مثـل الاقـواس
نبيـك تسلمـه بـإيـد زيـزوم الجهامـة
ليا ذعذع من الشرق وإلا الغرب نسنـاس
وصلك العلم مـن يمنـا يـا أبـو دلامـة
راشد :
انا ليش اعتمدهـا وهـي حبـرٍ بقرطـاس
تـرى تسليـم مكتوبكـم بعـد استـلامـه
وسلامة الجميع!
