[align=center]بسم الله الرحمن الرحيم
السلام على الأخوة الكرام
هذه بعض من قصائد الشاعر اللبناني طلال حيدر . من أشهر شعراء القصيدة الحديثة بالعامية في العالم العربي .
وحدن
وحدن بيبقو متل زهر البيلسان
وحدهن بيقطفو وراق الزمان
بيسكرو الغابي
بيضلهن متل الشتي يدقوا على بوابي
يا زمان
يا عشب داشر فوق هالحيطان
ضويت ورد الليل عكتابي
برج الحمام مسور وعالي
هج الحمام بقيت لحالي
يا ناطرين التلج
ما عاد بدكن ترجعو
صرخ عليهن بالشتي يا ديب
بلكي بيسمعو
وحدن بيبقو متل هالغيم العتيق
وحدهن وجوهن وعتم الطريق
عم يقطعوا الغابي
و بإيدهن متل الشتي يدقوا البكي
وهني على بوابي
يا زمان
من عمر فيي العشب عالحيطان
من قبل ما صار الشجر عالي
ضوي قناديل وأنطر صحابي
مرقو فلو بقيت عبابي
لحالي
يا رايحين التلج
ما عاد بدكن ترجعو
صرخ عليهن بالشتي يا ديب
بلكي بيسمعو
ركوة عرب
أحلى من الركوه
على منقل عرب
أحلى من الفنجان
حلوه
متل عُبي القصب
خيط القصب تعبان
جيبوا حدا من دمر
يدقدق وشم
جيبوا من الهامة
والوشم
بن محمّص وهب الهوا شامي
غمازة لعالخد
ماإلها إسم؟
والخد قدامي
ومكحلي ...
والكحل راسمها رسم
مين لبرا قلامي
ومشنشلي متل الفرس
والسرج خيّالي
بإيدا أساور من دهب
بتخش
بتخش؟
بيدور الطرب ليوم القيامة...
قومي اطلعي ع البال
قومي اطلعي عالبال
بِغيبتِك نزِل الشتي
قومي طلعي ع البال
في فوق سجادة صلا
والعم بيصّلوا قلال
صوتن متل مصر المرا
وبعلبك الرّجال
ع كتر ما طلع العشب بيناتنا
بيرعى الغزال
وَدّيت مع راعي حماه
يشفلي الطقس شمال
قللي السني جايي هوا
بيوَقّع الخَيّال
ياريت
ما سرجت الفرس
ولا بْعَتْ هـ المرسال [/align]
