ثبّتـه مـن ثبّـت الارض وآدرا فلـكـه ؟؟
[align=center]بسم الله الرحمن الرحيم
السلام عليكم ورحمة الله وبركاته
أخواني أعضاء مضايف شمر................
. أسعد الله أوقاتكم بكل خير ومايرضي الله سبحانه وتعالى .
أتقدم إليكم اليوم وكلي أمل بأن تكونوا قابلين هديتي المتواضعه لكم وهي عباره عن قصيده للشاعر المعروف /عبد الرحمن بن راشد بن البرّاك الغنــامي العتيبي .
لتشاهدوا معي هذه القصيده التي أعتبرت أجمل
قصيده عن الحب وحازت على جائزه مهرجان الشعر الشعبي
في منطقه الحويه التابعه لمدينه الطائف .
.
إليكم هذه الرائعه ,,,
=================================== ===
وآهنيّ اللـي حرمـه الله الحـب وعطـاه
قلب جامـد لـو يهـبّ الهـوى ماحرّكـه
داله مع النـاس واللـي ورى قلبـه وراه
ثبّتـه مـن ثبّـت الارض وآدرا فلـكـه
ساليٍ مـا قـط قلبـه تولّـع فـي فتـاه
ويمكن اللي وسط صدره مهب قلب .. تنكه!
ليت لـي والله مثـل قلبـه الميّـت هـذاه
ماعبـر حـدّ المحبّـه ولا احـدٍ جمركـه
لاجل قلبي بس يسلم مـن الحـب وعنـاه
مايجي له من ورى حدب الاضـلاع دبكـه
آتريّح من هـوى اللـي مذوّقنـي جفـاه
عقب ما خلخـل دفاعـي وسـوّا دربكـه
جيته وجاني وفـي جيّتـي ماجيـت ابـاه
مير خطّـط لـه بخطّـه وجـات متكتكـه
آدمـيٍّ كـل مـابـه يـشـدّ الانتـبـاه
زينـه مـن الله طبيعـي ولا بـه فبركـه
كن عينه عين حرٍّ وحـش يطلـب عشـاه
منوة اللي فـي يدينـه حمامـه وشبكـه
نظـرةٍ منهـا تعرّضـك لسهـوم الرمـاه
تحسب انّك بيـن نظراتهـا فـي معركـه
وفي جبينه مثـل بـدرٍ تعـلاّ فـي سمـاه
يجلـي بنـوره ظـلام الليـال المحلـكـه
وانفصاخ الليل عن النهـار مـع الصـلاه
بيـن خـدّه وشْعَـره يـوم آداره وافلكـه
إن وقف ياقف معه تقل لابـس لـه عبـاه
وإن جلـس ماكنّـه بشعـره ولا يملكـه!
ناسفه من فوق عنقٍ مثل عنـق المهـاه
المهـاه اللـي تذيّـر لا حسّـت بحْركـه
والوصوف الثانيـه غايـة مـراد الهـواه
من سببها أخبط بيمناي صـدري وافركـه
يوم يمشي قدم عيني مثل مشـي القطـاه
ماجداي الاّ اطرق الشعر لاجلـه واحبكـه
وآتمثّـل فـي معانيـه وبمـا الله حبـاه
وابدعه واجيـب الابيـات فيـه محكحكـه
هيه يامهمل وصالي وانا حـرصٍ (عـلاه)
واصل اللي حب ياصلـك والغيـر اتركـه
لق لي بالك وقلبك ليـا اعطيتـك وصـاه
كل ماجيلك بعلـم امسـك العلـم امسكـه
خلّنـي قـدام عينـك علـى كـل إتجـاه
والطريق اللـي عليّـه يوصلـك إسلكـه
تعرف إن مالي غنا عنـك يامـال الغنـاه
لاتعرّضـنـي بـصـدّك دروب التهلـكـه
الوصل في الحب شرطٍ من شروط الحيـاه
والجفا عكس المواصـل ولا فيـه بركـه
أنت بعـد الله فـي يـدك موتـي والنجـاه
غث محبٍّ هالـكٍ فـي غرامـك وادركـه
مايحسّب فـي مخاسيـرك بمـالٍ و جـاه
كل مايملك مـن المـال لرضـاك دمكـه
بانيٍّ لك فـي الحشـا بـرجٍ مشيّـد بنـاه
مثـل بـرج الفيصليّـه و بـرج المملكـه
كان في راسك حميّا علـى الـدار وحِمـاه
لايغيّر فـي نظامـك .. نظـام الأمركـه!
عبد الرحمن بن راشد بن البرّاك الغنــامي العتيبي
==============================
أتمنى أن تكون نالت على رضاكم وأستحسانكم وأن تعجبكم أجمعين .
تحياتي لكم وتقديري ,,,
اخوكم ,,,//نجـ سهيل ـم[/align]
