@@ الركن الطائي " 1 " شوارعنا وحريمنا @@
بسم الله الرحمن الرحيم
السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين
أما بعد ..
أخترت هذا الموضوع ليكون دائم .. أنفس عمّا في نفسي وأرتب مواضيعي نوعاً ما بعد صيام لمدة سنة عن الكتابة .. وأيضاً لعله يكون حلاً لبعض الأمور الأجتماعية ..
وسأبدأ بعنواني لهذا اليوم .. وهو شوارعنا وحريمنا ..
وسبب أختياري لهذا العنوان .. هو زحمة الطريق والمعاناة التي أعانيها ويعانيها كل شخص في الصباح والظهر .. أي في بداية الدوامات والنهاية .. ولنبدأ ..
----
هذه سواقتنا في شوارعنا .. !!! كيف لو ساقت الحريم .. ؟؟
منذ بداية الدوامات إلى المدارس .. القليل من يعرف حق الطريق ..
فهذا طاير .. وهذا معلق على البوري .. وهذا يزاحم ..
وهذا قاطع الإشارة ..
وقبل هذه الأمور كلها .. شوارعنا ضيقة .. والله لا السريعة ولا الداخلية ..
لم تتم التوسعة .. والسيارات أكثر فأكثر ..
الرياض العاصمة .. سكانها أربعة مليون .. هذا إذا ماهو أكثر ..
أشهر الطرق فيها ..
- الدائري الشرقي والجنوبي والشمالي " طريق التريلات"
- طريق الملك فهد " طريق الزحمة "
- طريق خريص " طريق الحوادث "
- بعض الطرق السريعة المليئة بالإشارات .. مخرج 9 و10 و14 و15 ..
المهم ..
هذه الطرق رغم أقدميتها .. وشهرتها .. لم توسع .. ولم تفتح خطوط أخرى أو تطور أساليب أخرى لمعالجة هذه الزحمة ..
الكل متضايق من هذه الزحمة .. الكل متأخر .. الكل يشكي ..
أرى وأنا في سيارتي الغضب في عيون الآخرين .. عند تعطل السير .. والمرور .. آخر من يصل .. والأهم عندهم .. عليك مخالفة وأدفع ..
طيب .. هذا وأنا لي أكثر من 10 سنوات في القيادة ..
لم تطور هذه الخطوط .. ولم تطور أساليب القيادة عندنا .. الأغلبية متهورة .. فإلى متى ؟؟؟
ومع كل هذه الأمور .. وحريمنا لم يسقن .. أوووه كيف لو صار ؟؟
أنواع الأمراض .. سكر وضغط .. وغيره وغيره ..
استغرب من الذين ينادون بقيادة المرآة .. يا أخي .. إذا الرجاجيل .. نقول عنهم مايفهمون بالقيادة .. هذا يشخص .. وهذا يأكل .. وهذا غشيم .. أجل وش نتوقع من المرآة .. أكيد تبي تشوفها وهي تكحل وتحمر وتطيب .. " ولا عندك أحد يبي يغض البصر " " أنواع الحوادث "
وتعالوا هنا نبحث عن الحلول ..
والله أعتقد .. لو بكتب بحث كامل عن حلول المواصلات .. مانفذ منه شيء .. ويامن كتب في الصحف والمجلات والنت .. ولا عندك أحد ..
طيب وبعدين ..
ولا قبلين .. أقعد أحرق رزك .. وفضفض مافي قلبك .. لعل الناس تعي ويفهم شخص واحد فقط .. والله نعمة لو يفهم واحد بس ..
أمّا مواصلات المسؤلين .. عساهم يوعون عيالهم وسواقينهم ..
ويمكن بعد 30 سنة .. تطلع خطة جديدة لتطوير شوارعنا ..
أ.هـ
---
الحلقة القادمة عن :
" بطاقات تخفيض للطبقة الضعيفة "
وتقبلوا تحيات أبو جود
" نخبة من الردود .. للفائدة "
السلام عليكم ورحمة الله وبركاته ..
هذه عدة ردوود للمشاركين نسختها لعل يكون فيها فائدة للقراء ..
@ منتدى سوالف @
- بالأمس كنت أفكر في هذا الموضوع .. وأحدث نفسي أثناء ذهابي إلى الدوام .. وأنا أرى الازدحام الشديد حول أي منظقة تحوم حولها مدارس ..!!
وأقول ..
كيف لو سمح للنساء بقيادة السيارة ..!!
ستتضاعف عدد السيارات أضعافا هائلة !!!
ولكثرت الحدوادث بسبب تردد المرأة وخوفها من منطقة مزدحمة ..
وقد تسيء التصرف ..
وما الأضرار المترتبة على ذلك ..
فطردت الفكرة من بالي بسرعة ..
وحمدت الله على مانحن فيه
معي أخي .. جزاه الله خيرا .. يوصلني إلى أي مكان وأنا في قمة الراحة " هايدي "
- ماشاء الله عليك .. مسوي تبي تحل هالمشكلة
هاذي ياطويل العمر .. أصعب من مشكلة فلسطين !!
أنا معك الكل يعاني من مشكلة الزحام ..
لكن صدقني لو كنت في وزارة المواصلات .. صدقني تقرأ لك جرايد أصرف لك ..
يالغالي مسألة الطرق .. مسأله تقلب الراس ..
تدخل فيها أمور كثيرة .. ليس من السهل أن يقومو بتوسع الطرقات ..
فهناك أملاك خاصة وأراضي وعمارات سكنية وتجارية ضخمة ..
فمثل هذه الأمور .. أو مجرد التفكير في توسعة طريق أو بعضه ..
قد تكلف الدولة الملايين حتى تتم التوسعه اللي اقترحتها سعادتك ..
والحقيقه أهم ماهم ناقصين أحد يتفلسف عليهم .. وأهم مطفرين
لذلك الله يعينك على شوفة العيون الحمر كل صبااااااااااح ..
وكل صباح وأنت بألف صحه وعافيه
آسف للإطالة ..
أما سالفة سواقة النساء .. فهذه سالفة .. لم أتكلم فيها قبل ولن أتكلم فيها بعد .. " ملقوف "
- تقولي زحمة سيارات .. أبدا الأمور زينه واخر حلاوه
وما يخغاك شارع واحد يدخلك على عشرطعشر مدرسه
وكله يبغى يوصل بوقت محدد
عارف ان أشوف ان أقرب حل .. هو التوقيت في الدوام
تلاحظ ان الزحمه تزيد بفتره محدده من السنه ..
يعني لو يحددوا فترة دوام الدوائر الحكوميه من الساعه 8 صباحا
والمدارس من 7 بيكون هناك تخفيف للكثافه المروريه نوعا ما
هنا تجد فئه معينه ما راح تطلع من بيوتها الا سبع ونص
أحنا مو خلصانين من سيارات الليموزين زي النمل .. تجي وتقول ....
اقول الله يوفق مخك بس
همسه :
أنتظر موضوعي عن تعديلات إشارة المرور " أسير الليل "
------
@ منتدى العرب @
- نعم كلامك واقع ولكن النساء لا يفهمن الا شي واحد ,, هو ان يصبحن مثل الغرب بكل شي
اي تقليد اعمى ... والله يستر " سهران الليل "
- أما اذا بتروح عن نفسك...
فمشاكل الطرق والمواصلات...اذا لنا يد فيها أو راح نغير بكلامنا شي فشيء رائع...
أما إذا ناقشت أسلوب قيادة السيارة ...
فينقص الموضوع وجهة نظر نسائية.....
أقول:...
تشوفون الاختلاط بالتعليم وش يسوي....
تشوف الالتزام بالقوانين ولا أروع طبعا محد يرضى على نفسه يتهزأ قدام بنات...
وكلن يبي يكون مصدر اعجاب واهتمام...
ويمشوا ساعتها على المسطرة...
ولو ساقو الحريم.....
تلاقيهم أخلاق اللي يخدم......... واللي يترك الحرمة تعدي وطلباتكم أوامر...
ولا أروع...
ولوأني مع ان قيادة المرأة للسيارة لن يكون ايجابيا بقدر سلبياته...
بس لو ماتصلحت الطرق...
يمكن لو ساقوا الحريم تتصلح
عشان خاطر عيونهم...
ولا تستهينوا..... " قطر الندى "
------
@ ديوانية شمر "
- اذا رفعنا الغشاوة الي تظلم على عقولنا ومحولة نهارنا ليل وانفتحنا وتقبلنا الراي واقمنا الحجة لانة على فكرة كل المبررات الي يعطيها الناس عن ممانعتهم قيادة المراة للسيارة سخيفة لا تعدو كونها اوهام .يعني المشكلة بالشباب شباب وانا ابي اقولها دون تحفظ الشباب السعودي مقحط متعطش للمراة وهذا وصمة عار على شباب السعودية
يعني مايصدقون على الله شافو مراة الا رقموها وبهدلوها يعني بكرا الشباب راح يتاخرون عن الدوام والسبة امراة مرت من طريق الملك فهد وصار ازدحام يعني
المشكلة بالاساس بالشباب وهذا راي طبعا اذا فيه احد يوافقني عليه
اخوي النابغة مشكلة الطرق الي يتحمل مسؤليتها البلدية وفشلها في اداء واجبها على اكمل وجه لو نتكلم من الان لبكرا ماراح يخلص الموضوع وماكو حل. " الياس الشمري "
- اذا انتم يا اهل الرياض اللي عندكم اوسع الشوارع بالعالم العربي والعالم الاسلامي
وش نقول عن بعض المدن في بعض الدول اللي سكانها 80 مليون والطرق عندهم صغيره
انا ما القي اللوم على البلديه بموضوع الطرق
انا القي اللوم على المروووووور وعلى السواقين
لو يترتبون ويمشون بالنظام لما صارت زحمه
بس وين اللي يسمع
وايضا اللوم على المرور لانهم يسمحون بالشاحنات المرور اوقات الدوام " أبن عبيكه "
------
@ منتدى برزان @
- قد اكون ممن يتورط في احد الشوارع المذكوره ولكن لاحظت ان كل كلامك تشخيص لواقع يعرفه اللي "في بطن امه " ...
ولكن مالحل ؟؟؟
هناك "حلوووول" ..
من وجهة نظري المتواضعه ان المشكله ليست في طرقنا ولكن في تعاملنا مع الوقت فنحن من يقتل الوقت ليلا ويتاخر في النوم حتى الساعه السابعه والنصف ويتمنى ان يصل الى دوامه " الساعه سبع ونص الا خمس" ...
اتفق معك ان هناك مشكله مروريه ولكن مشكلتنا مع الوقت اكبر واخطر واكبر دليل " شف كم يمشون " اصحاب السيارات على طريق المطار
علما انك لو تقدمت نصف ساعه فستصل قبل الوقت المحدد " ويمديك تدوزن عمرك " قبل بداية الدوام
لك اجزل تحياتي السريعه ..
"اوووووففف "
ملاحظ اني "ماجبت اي طاري " للحريم ؟؟
لاننا لو نظمنا وقتنا "فستسعنا " شوارعنا جميعا بكل اريحيه ...
"علما اني لا امت لدعاة تحرير المرأه باي صله " ... والله ... " شارف"
- خايفة اتكلم اصير من دعاة تحرير المراة المغضوب عليهم مع اني مدري وش دخل بعض الامور العاديةا لقابلة للنقاش والتغيير دام مافيها تعارض مع الدين وش دخلها بخزعبلات تحرير المراة!!!
المهم
موضوعك جميل اخي ربطت فيه بين الزحمة وبين قيادة المراة للسيارة ومدري انت تبغا تناقش اي فيهم بالتحديد
لاني شخصيا ما اظن اذا ساقت المراة لها علاقة بالزحمة لان بكل بساطة السيارة اللي بتاخذ حيز في الشارع كان يسوقها سواق هالمراة من قبل يعني ما اختلف شي
اذا على الزحمة موجودة في كل الدول وبشكل خانق ويا حليل الرياض قدام دول اخرى
حتى الدول المتقدمة بشوارعها وتنظيمها واللي متبعين مبدا القيادة فن وذوق واخلاق تلاقي عندهم ال rush hour ولله شوي وتتحنط وتموت وانت في الزحمة
وصراحة رايي الشخصي يقول ان ايجبيات قيادة المرة للسيارة تطغى على السلبيات هذا لو وجدت الرقابة والوازع الشخصي والحذر مثل ما لازم هالمقومات تكون موجودة في اي شي اخر مرتبط بالبنت وساعتها تكون ايجابيات قيادتها اكبر
ومع هذا الراي الشخصي اقول ان قيادة المراة في السعودية الان وبالتحديد وفي هذا الوقت شي صراحة صعب جدا والافضل يبقا كذا " lol "
-- رد آخر --
- انا معاك قلبا وقالبا بلنسبة للاستفادة من اختلاف الاراء
بعيدا عن التعليقات والترهات بالنسبة للزحمة اكرر ان حيز السيارة والسيارة بحد ذاتها ما بيختلف فيها الكثير لان السيارة كانت ماخذة الحيز في اي شارع ولكن اذا ساقت المراة الاختلاف يكون في من يسوق هذي السيارة
والزحمة موجودة في كل مكان اذا نبغا نتكلم عنها كقضية ومشاكلها وحلولها رايي ان ما دخل سياقة المراة في الموضوع
بالنسبة لرايي ان في الوقت الراهن صعب جد تسوق المراة في الرياض فذلك لعدة امور اهمها ان المجتمع بيكون صعب عليه يتقبل هالشي ونظرا لتصرفات اغلب شبابنا الله يهديهم مع البنات وهم مع السواقين يصير قياسا عليه ممكن نتوقع الاخطر والاكبر
ولكن اذا جيت لاي دولة تسوق فيها المراة وانا مثلا وحدة منهم اعيش برا بلدي مع اهلي واسوق سيارتي واروح فيها جامعتي فالوضع مختلف وايجابياته فعلا اكبر من سلبياته
رب البيت مهو محتاج يجيب ويستقدم سواق بالمبلغ الفلاني ويامن سكنه واكله وشربه ويتحمل مشاكله وقرفه هذا كتوفير مادي واحيانا تضطر نفس العايلة تجيب اكثر من سواق ويصير ربة البيت ممكن تقضي اغراضها بنفسها والبنت ممكن تروح جامعتها وتوصل مثلا اخوانها واخواتها
والاب او الاخ او الزوج مهو مضطر عندها يطلع من دوامه اذا مافيه سواق مثلا ويروح يوصل هذي والثانية ويكون مثل السواق طول اليوم لمشاوير اهل بيته
هذا غير قضية ان اغلب الاحيان يلزم سيارة للسواق خاصة وسيارة خاصة برضة للسواق اذا وصل احدى نساء اهل البيت لان مش معقولة يركبون السيارة اللي يروح فيها سوق الخضار وسوق السمك هذا غير سيارة السوارية للعيلة كلها مع الرجال
هذا ناهيك عن حجم العمالة اللي في هالحالة يمكن الاستغناء عنها واللي اكثرها مصدر للمشاكل
المراة فتنة اخي اذا كانت و وضعت بوضع معين وكان باختيارها او اجبارها انها تكون فتنة واذا كانت المراة تقود سيارتها بلباسها الشرعي وتحترم نفسها وتراعي هي ومن هو ولي عليها بعذ الامور التي تحميها من الوقوع في الاخطار كالسواقة ليلا او الى اماكن بعيدة.. الخ اجل وين المشكلة؟ ومو هذا بيكون اوفر لوقت وجهد كبيرين
وبعدين يا اخي الحين اذا المراة فتنة وما نبيها تسوق اجل هي مش فتنة لما تركب مع سواق اجنبي وتروح ابعد المناطق معاه؟؟ ومو عرضة بهذا الشي للاخطار بعد؟
البلاد اللي تعودت المراة تسوق فيها الوضع جدا طبيعي ومافيه مشاكل تذكر بالنسبة لوضع البنت والشاب والمعاكسات صح موجودة بس للي تعطي وجه للشاب مش عشانها تسوق سيارة ,وصدقني المعاكسات في هذه البلاد نسبتها اقل منها في السعودية اذا اخذنا جانب وجود البنت في سيارة او مع سواق
وصراحة من ناحية دينية مقدر افتي فيها بس ما اظن انها صدرت فتوى ان سواقة المراة حرام
واذا بقيت على العادات والتقاليد انا معاك قيادة المراة في السعودية بالذات الحين صعبة جدا ولكن عند رايي ان بشكل عام قيادة المراة له ايجيابيات اكبر في الدول اللي تعودوا على هذا الامر " lol "
------
@ منتدى الأحرار @
- والله ياخوي كلام سليم وجميل
بس وين اللي يفهم وينفذ " ريانة "
-------------------
أنتظروا
" بطاقات تخفيض للطبقة الضعيفة "
وتقبلوا تحيات أبو جود :)
