-
رمضان شهر النوم؟؟؟؟؟؟ والصوم .
هذا برنامجي المتواضع عن قيام وصيام وعمارة رمضان
بالعبادة والصيام والذكر .
لم يكن برنامجي لرمضان السنة الماضية مرضيا لي
ولذلك فانني قلت ياربي سامحني وبلغني رمضان
السنة القادمة وهو رمضان الذي( هل ) بالأمس علشان
أغير برنامجي هذه السنة:
وفعلا الحمد لله بلغني ربي هاالشهر والبارح من اولها
يوم أعلنوا الشهر رحت للإستراحة وقلت ابشوف الربع
واباكلهم بهاالشهر الكريم ويوم جاء نصف الليل
(ونشقنا)هاالريح الزينة تعامير ومعسل ومالبورو
وشفنا هاالقنوات وهالوجيه السفرة! وتنطيل(هااللحوم)
قلنا عاد نبي نغير الجو والله وحنا نجيب الورقة و
ندق الولد ونقوم نلعب اللعبة الي يسمونها البيلوت
((ورقه)):
انا عاد بلاني الله بلي غشيم ويرفع ضغط اللي يقابله
كيف ياجماعة مرتين يذكر 400 وينساهن مافرشهن
اعوذ بالله منه .
وانا عاد قايلله من اول ياخوي لاتلعب معي تكفى تراي
جاي ابتونس لكن هو الله يهدي (باتكس) ولا تهون لزقه ((جونسون الأصلية)) .
المهم لعبنا بلوت لين جت الساعة ثلاث وربع الصبح
والله ونقوم وكلن يسري لهله ونسينا عاد نذكر دعاء
كفارة المجلس لأننا يمكن ماقلناه من خمس سنين
وبعدين لو قاله واحد يمكن يستنقدونه الربع ويقولون
وش ذا الموسوس و يمكن بعد ياصمونه بالرجعية
والتخلف !!!
المهم يوم وصلت البيت والله والقى السحور جاهز
واتسحر
واتقهوى واشرب ماء واجلس انتظر صلاة الفجر
ويوم بقي على المذن حوالي عشر دقايق وياوالله اني
n
دايخ مااشوف الأرض وهو يجيني الشيطان وهو يحكي
باذني ويقول يابو يزيد يامال الغنيمة ليه (ماتغط) لك
خمس دقايق ياما تقرب الإقامة وبعدين تقوم وتصلي
((اطع شوري تراه ازين لك))
قلت والله تهبا هنا!! بس !! هنا ياالخاسي عاد ولا
تعوذت منه ولا لعنته لو انها ماتجوز !! والله واقوم
انسدح على الكنب قلت بنفسي ترى مايضرني
الإنسداحة لو دقيقتين ابتمغط ((وانا بالصراحة متوقع
ان الشيطان مايقصر ورايح يمر علي وينومي لأني
متعود على هالحركة لا وضامنها )
المهم مادريت الا بطيحتي من الكنب على الأرض ويا
والله الساعة سبع الصبح قلت بسم الله انا منين انا
جاي والله واقوم اصلي الفجر وادخل على الأنترنت
بعد ماصليت مباشرة قلت علشان انتظر صلاة الجمعة
يمكن لو نمت ماقعدت وصليت والحمد لله جلست لين
جت الساعة 11 لكن المصيبة ان عيوني قامت ادمع من
كثر ماطالعت للشاشة قلت ياولد رح لفراشك وركب
الساعة لين قبل الإقامة بربع ساعة واقعد وصل مع
عباد الله والله وانام وعليه لين اقعدوني وياوالله علينا
ليل (عد انا نويم بالساعات)
واقوم افطر واعين من الله خير قلت لأختي وش وقتنا
هالحين يالحبيبة ؟؟قالت ليه انت مامعك ساعة ولا
مقلوب راسك ياخوي؟؟ ترانا هالحين مصلين
التراويح
قلت :صحيح والا تمزحين ؟؟قالت لوالله الا صحيح .
قلت(ياخسارة………ياخسارة !!!عوذا ……عوذا عوذا…وانا
امسك راسي!!! قالت وشبك وشبك عسى ماشر
ياخوي؟؟؟
قلت :ماغير هاالشر ننعنبوا حيك !! كيف فاتتن طاش
ماطاش ليه مااقعدتيني !!!!!!!!!!!!!!!!!!!!!!!!!!!!!!))
المهم اني يوم صحصحت زين وياوالله(( راسي دايخ
يبيله راس ))ولا على الأقل معسل وهاذا انا من العجلة
اكتب وانا واقف أبروح للربع مثل البارح واكيد اني
ابااشوف القنوات والعب ورقه واسري وانام قبل الفجر
وسلامتكم.
وهالحين ياجماعة يوم فكرت بصوم اول يوم وياوالله
هالشهر الكريم صيامه خفيف على النفس والله اني
مادريت ياجماعة اني صمت .
وفعلا هالحين صدقتوني ان شهر رمضان هو ((شهر
الصوم اللي كله نوم …………وعسى الله مايبلانا!))
وتحياتي لكم
وياربي لاتؤاخذني
\nوتقبلوا تحياتي
اخوكم
ابو يزيد
-
ابو يزيد
بصراحه بصراحه
موضوعك
قمه قمه قمه واسلوبك في الكتابه
رائع جدا وانا استغرب فعلا
عدم وجودك في احد الصحف او المجلات
لان اهم شي في كتاباتك هو المطلوب اعلاميا
الا وهو
اسلوب النقد الساخر الكوميدي
والصادق ونقد الذات بدون المساس باي شخص او منضمه او سياسه
صراحه اجد كيبوردي ( حلوة كيبوردي ) عاجز عن انصاف وانا بعتبر نفسي من اليوم القاريء رق واحد لكل ما تكتب
وتقبل تحياتي
,,,,,,,
-
الجلكوز وصل معي 700 وين الأبره
ابو يزيد
ما انا قايللك انك انت جلكوز المضايف
تسلم ويعطيك الله الف عافيه
لك الحب كما تحب
اخوكم المحب
-
الأخ/برزان
الشهر مبارك
وكل عام وانت بخير
بصراحة بصراحة اني
أنا اللي تشققت من هالمدح
تراي لي ثلاثة ايام وانا كل شوي
رايح وقاري تعقيبك لا.عاد ماتدري وش
سويت بعد هاالتعقيب سويت مكرمة لأهل البيت
وفتحت غرفتي وقلت ياالله اقرو وش مكتوب عني
تروني ابيكم تعرفون اني جالس معكم في
هاالبيت مجاملة ولا انتم ماانتم قدي
وهالحين لازم تكرموني بسرعة
لأني وصلت القمة ويمكن
اقدم استقالتي
ـــ
ـــ
ـــ
ـــ
n((لأني ماني بسيط))
اخي برزان تدري
ليش استقلت هه جاوبني
وترى اذا ماجاوبتني بيضيق
صدري مرة لأني حسيت انك فهمت
اسلوبي((الله وكبر اسلوبي!!))انا اقولك الجواب
((لأني هالحين انا اكتب هالتعقيب من مكتب المجلة))
لأنهم تعاقدو معي بعد ان بهرتهم ((كمون،،وحلتيت))
كتاباتي!!واستطاعو ان يضفروا بي بعد صراع
مرير مع احد مجلات الأزياء الشهيرة
والتي مات مندوبها عطشا وهو
يبحث عني في فياض الصمان
وانا اتصيد الدخل والقميري
واقفل محضر موته بالشرطة
على انه ((تائه))
ـــ
ــ
ـــ
ـــ
………………….ولماذا تائه ؟؟؟؟
لأنه يبحث عن كاتب مثلي .
((اخي برزان يشهد الله اني ماقدرت
اوقف الفارة واخلص التعقيب لأن هالفارة
من نوع((العريص فيران اهل الرياض))
اللي تدقه بالعصى خمس مرات ثم يناظر
لك بعد نظرة تحدي .
اكررمن محبة نفسي لك لم استطع التوقف
وانسان مثلك مكسب انه يقراء لي ويعلم الله
اني افتخر واعتز بكل ماكتبته عني فلك مني
خالص الشكر وعظيم الإمتنان وانت اعتبرك
احد المكاسب اللي كسبتها من انتمائي لهذه
الشبكة
واخيرا وعلى كثر حكيي((هذرولوجي))
ماعندي كلمة اختم فيها تعقيبي
الا ان اتسلف كلمة اخوي ابوخالد
الجرباوهي:
لك الحب كما تحب
اخوك
ابو يوزيد
-
الأخ/ابو خالد الجربا
الشهر مبارك
وكل عام وانت بخير
وتشكر على هاالتسمية
بس بيني وبينك راحوا فيها
أعضاء الشبكة يعني انا ((سكر جلوكوز))
وأنت((ملح (ساس)تجيب الضغط)) ماعزالله انهم بخير
لكن عاد أشوى أنا سكر جلوكوز الفواكه أشوى ماني
سكر الشعير((المالتوز او الفركتوز)) وإلا صارت
المسألة ماهي مسألة سكر وانسولين لكن المسألة
بتصير مسألة ((سكر)) يعني تسطيل وبعدين
هه ربك يطلعون من هاالشبكة كل واحد يدربي راسة
ويقبض عليه بتهمة ((السكر)) اللي ماهو الجلوكوز.
ولاكن مااقول إلا.
يامحلا ياسطروهن على الوجار***صفر الدلال مسكرات العيالي .
خاصة وان اهل الجنوب يبهرون دلالهم بالشعير
ولذلك ماهي غريبة تلقى بالمجلس الرجال والعنز كلهم
يتقهوون من دلة وحده.
اخيرا
لك خالص
الشكر
على مداخلاتك
ولا تبخل علينا حركنا بهاالمداخلات
((وانت عارف ان السكر ((يزيد !!)) حلاه
بالتحريك!!! ))
وتقبل تحيتي
اخوك
ابو يزيد
-
ابو يزيد يا شمعه المنتدى
موضوع ولا اجمل من كذا
<<----- مات من الضحك على.....عوذا....عوذا....عوذا
الله يعطيك العافيه
ويكثر من امثالك هنا دون قصووور با الباقين:D:D:D
-
اخي/شواح
السلام عليكم
تشكر على التعقيب
وابداء وجهة نظرك
وشكرا للإطراء
وبيض الله وجهك
وكما تعلم يااخي شواح
هذا صيام شبابنا سهر
وقنوات ونوم وقلة صلاة
وعسى الله مايبلانا وان
يتقبل مناومنكم صيامنا
وقيامنا.
اخيرا
تقبل تحيات
اخوك/ابو يزيد
[معدل بواسطة ابو يزيد بتاريخ 22-11-2001 عند 09:00 PM]
