ابي اموت .. شلوووون ؟؟

عاد هالموضوع جايكم وانا جايب طبلوني مليون مدحن ابو مشاري وطرت بالعجه .. بس لحد يثبت الموضوع ..((اخس يالثقل )) مابي الاعضاء الجدد يحسون بالتمييز داخل المضايف (( لا مهتم ماشالله عليك .. اخلص وشعندك)) هاه لا سلامتك بس ((تبوبست حنوتسك شتبي ماورانا الا انت ؟؟)) عمى يعميك خلن استرسل ....(( وشعلمي قمت اتخانق مع روحي ...)) جودوني زين تروني نوبات اتهور واضرب روحي بالكيبورد ))

زين..




يوم من الايام وبليله من الليالي كان الجو حااار والسما غيم والشمس طالعه والمطر يصب ... طفشت من جلسة البيت قلت لنفسي ليه ماانهج اتمشى لي شوين .. والله وانا اطلع واركب عموشه ((لايروح بالكم بعيد عموشه هذي سيارتي هايلكس 80 قرمبع انواع الخرابات )) وادقه سلف واطلع افرفر بالشارع وهم يمسكوني الشرطه ويتهموني بالفرفره الزايده وياخذوني معاهم للقسم وتحقيق ليه تفر؟؟ قلت بالله عليكم وش تبوني اسوي ؟؟ لاشغل ولا مشغله .. وظفوني والله ماتشوفون فرتي نوبتن ثانيه هنا وكالعاده وبدون مقدمات :: طفايه تمشي مليون بالخشه وطراقات يما طلعوني برا ::: اذلف لاهلك ولاتورينا وجهك يله...


وانا اطلع من عندهم طفشان وقافلتن معي واصلتن خشمي وانا اروح للبيت يوم زاد طفشي وانتم تدرون لااقدر اطلع اخاف انقفط ولااقدر اسوي شي ...

مادريت الا هذا شوشو الله يلعنه ((شوشو هذا الشيطان اللي يزن على راسي وادلعه شوشو عشان الميانه )) وهو يقعد يزن فوق راسي قم انتحر اصرفلك من هالعيشه والله انك عاله على المجتمع لاوجه زين ولاسيارتن زينه ولا مخن تفكربه يعني دلخ مدحدر بالديان ..المهم اقتنعت قلت فعلا وشوله عايش انا لصار لاعندي هدف ولا عندي قول ولا شي ؟؟؟؟ مثل ماقال شوشو ليه ماانتحر والمثل يقول اللي تغلب به مد رجلك على قد لحافك...

والله وانا اروح للحمام ((وانتم بكرامه)) واخذ الموس ناوي اقطع العردز ((متاثر بالافلام المصريه))... وقبل لااموت .. فكرت وقلت لنفسي :: ياولد موته وبالحمام والله مهي زينه بحقك ... ليه ماتشوفلك موتتن ترفع الراس ...

المهم وانا اطلع من البيت وامشي على رجليني وتشوفن عموشه وتناديني يانسنااااس تعال وين تبي وانا طناااش وتنادي وانا مطنش قالت والله ان ماجيت لادوسك على علمتك.. وين رايح مدحدر؟؟؟ قلت اتركيني ياعموشه ماني فاضي ... قالت علمن اغديني اقدر اعاونك ... قلت اسمعي .. اتني بهذا يما اجي ((والله ياهي تبي تتنا ))

وانا امشي من عنده وافكر بطريقه انتحربه قلت ياولد مالك الا تطبدز من فوق اعلى عماره بالحاره واكيد عقبه راح تودع .. واقوم ادور عماره مالقيت الا بيت ابو فلاح دور ونص .. يعني لاطبحت من فوقه مااموت ...

المهم قلت ياولد مالك الا تطق لك قزازة كلونيا من دكان ابو لطيفه وتفرقعه وان انفجرت ميه بالميه بتموت .. وانا اروح للدكان بس ياحييييف لقيت الكلونيا خالصه .. مع اني شايف عنده قبل اسبوع خمس و عشرين قزازه ..قلت يالله كل هذولا يبون ينتحرون مثلي؟؟


المهم طلعت من عنده وانا اصراري يزيد على الانتحار ... قلت ياولد مالك الا تروح لعموشه وتدقه سلف وتمسك حدى هالخطوط اكيد تبي تشمعلك ببعير وتودع ...والله واركب عموشه بس قلت لنفسي غميضه عموشه خل اخلي لاهلي شي يسددون به ديوني ...


قلت ياولد ليه ماتموت بشهره .. رح افرشلك زوليه عند الثانويه ومليون بالميه يبي يجيك حدى هاللي يفحطون ويصكك الا انت في خبر كان ...بعدين قلت لنفسي وشوله هالحوادث اللي نسبة الموت به تسع وتسعين وتسعه من عشره بالميه .. دور لك موته بنسبة ميه بالميه ...


وانا اصفط عموشه واقوله ضفي وجهتس للبيت واتنيني هناك .. وانا امشي على رجليني قلت ياولد مالك الا تروح لحدى هالمستشفيات وتقولهم عندي زايده اكيد بيشققون بطنك ويطلعون المصران التاسع طعش ولاتقولي عقبها انك بتعيش؟؟ هذي عاد الموته مضمونه .. ويجي مسبوع الابو ملعون الصلبان شوشو ويقول يله رح للمستشفى اذبح نفسك هناك وش تتنا؟؟ .. قلت لا ياولد انا اعرف نفسي وقليبي اخضر واخاف لاشاف هالممرضات وهالزينات يخق ويهون عن الموته

قلت ياولد ليه ماتسوي مظاهره بالشارع؟؟ وشرط انهم بيذبحونك بقناصه من حدى الدرايش وترتاح وتريح.. ورحت ادور موضوع للمظاهره يعني عن وشو؟؟ توهقت .. لقيت كل شي عندنا يبيله مظاهره ان جيت بنزين وان جيت كهرب وان جيت هاتف وان جيت بيوت واراضي ومدارس وووو ... المهم قلت بلا هالشغله وشفلك موتتن ازين...


قلت مالك الا تروح تدور وظيفه .. اكيد بيطق لك عردز من كثر مايقولون مانوظف احد .. بس قلت لا ياولد اصلا انا متعود على هالكلمه ...

قلت بس .. مالك الا هيفا .. قصدي مالك الا تروح تتكي تحت جدار مدرسة بنات منها تكحل قبل الموته ومنها تموت وترتاح .. اكيد بتطيح عليك بلكه تنقلك للقبر على ترانزيت...

وانا رايح قلت لنفسي ::

كل طرق هالموت عندنا وانا اقول ليه هالعالم تموت ؟؟ اثري ارواحنا رخيصه لهالدرجه؟؟..


المهم وانا امشي الا هذا شوشو ((يملا الدين ياشوشو شجابه)) قلت شتبي ياملاك الساحق الماحق اللي يسحقك ويمحقك ويمصع رقبتك اصلا ماودانن بداهيه الا انت ؟؟.. قال :: تسانك صادز رح خذ رشاش ولد خالك وارم روحك ..(( لعن ابوه يبي يضمن موتتي ))

بس انا اذهن منه .. قلت لاااا .. انا اعرف وشلون انتحر ... مالي الا اروح للرياض وادورلك البرج اللي يسمونه الفيصليه واصعد فوق واطبح من فوق ...

والله وانا اروح .. المهم يوم وصلت هناك ويعيون يدخلوني قالو ممنوع كود تجيب معك عايله قلت لعنبوكم حتى الموت به عايله لاربحتو ... وانا احاول به قلت له وهالعالم الكاشخه داخل ليه؟؟ قال :: تسانك مصمم اقدر ادبر لك بنت تدخلك بخمسين قلت ماشالله وتقولي بكل بجاحه ؟؟ اصلا لو عندي خمسين تسان ماجيتك ..

.المهم وانا اتودد للبنات اللي برا اغدي وحده منهن ترضى تدخلن معه .. واشوى لقيتلك اكا البنيه اللي كلشي به حلو وانا ادري انه ماوافقت عشان حلا وجهي .. ادريبه ادري وافقت تبي تضحك علي دزدام خوياته ..وانا عاد وش يضرن لصار ميت ميت .

المهم وانا ادخل معه مار وتطير عنيواتي وتختبص رجليواتي وانا اتخربط مار مادري وين انا وكاد ماحنا بالسعوديه هالمزيونات اللي تقل لابسات سلط ملط يتمشن وهالعالم الكاشخه اللي تقل يبون يعرسون المهم وانا افنقس على خشتي وتقومن هكا البنيه قلت مشكوره قالت ميرسييي .. قلت :: اقول ياام الشباب .. ابصعد فوق شلون؟؟
قالت :: تبي المطعم .. قلت ايه .. قالت ادليك عليه بشرط تعشيني على حسابك .. طبعا كان ردي بكل بساطه :: اعشيتس واعشي مندوبتس لعنبو -- طووووط--((رقابه)) تكسره الرهزه ... فكرت بيني وبين نفسي باللي سويته .. قلت يله .. منه نكحل ومنه نفرفش مع هالبنيه قبل الموته ومنه اموت وانا شبعان .....

المهم وحنا ندخل المطعم انا وياه وريحته ريحة هكالعطر اللي لامنك شميته تصير مناخرك تقل مناخر احلام يوم تلبس هكالثوب الاصفر .. قال راع المطعم وش تبون ؟؟ هي طلبت شي مدري وش يسمونه وانا طلبت مثله... المهم تعشينا وفرفشنا وضحكنا .. بيني وبينكم جازتلي القعده والضحك والفرفشه والمواعيد والخثره والبسط وهونت عن الموته لولا ماجزمن على الموت الفاتوره يوم شفته قلت ياولد مايبيله ون تو .. ان مامت الحين بتموت بالسجن ..لعنبوهم عشا بسبعميه وثمان وستين ريال وانا ماعندي تسع تريل ومن شفت الفاتوره قلت ياولد الموووووت قم لاتفشل نفسك دزدام البنيه موت قدامه وانت رجال ...

المهم وانا اثور واكسر قزاز المطعم واقف على حافة البرج .. والعالم قامت تصايح وتنايح .. قلت لحد يدزرب انزحووو غااااد ... والله ين قرب احد لاجدع روحي من فوق ..وشفت العالم قامت تنحاش مادري وشبلاهم بغيت انحاش معاهم .. الا هذا شوشو واقف بينهم يقولي :: يله يابطل طبح طبح من فوق انجز اخلص الموته وحده والرب واحد والدنيا فانيه ..هها .. ارتاح وريح ولاتفشلنا دزدام البنيه العن ابوه شوشو منين له هالاسلوب )) الا هذولا الشرطه .. يركضون .. قلت ايه هلحين جيتو بسرعه ويوم يحترق بيت جيراننا ماجيتو الا يوم فحمو المساكين ويوم ينسرق بيتنا ماجيتو الا عقب ماخذو الحراميه اللي يبون .. قالو وش طلباتك وحنا نجيب اللي تبي ..

قلت تجيبون اللي ابي ؟؟ قالو ايه قلت اكيييد؟؟ قالو اكيييد ... عاد انا قمت افكر وش ابي؟؟ توهقت صراحه وقمت ادور شوشو هو اللي ينقذن الا هذاك هو ملعون ابو الصلايب ياكل بالمطعم من فضلتي انا والبنت .. لعنبوك ياشوشو ورطتن وخليتن اسمع كلامك هين انا اوريك ..

المهم قلت لهم ابي البنيه اللي مشوين .. قالو بس كذا؟؟ ابشر ... قلت وابي تدفعون حسابنا انا والبنت قالو ابشر ..؟ بس؟؟؟ قلت لا ... وابي تبنون لبو فلاح دور ثاني وثالث عشان اللي يبي ينتحر مايجي هنا .. وابيكم تعبون دكان ابو لطيفه كلونيا وتكثرون البعارين بالشوارع .. قالو بس؟؟ قلت لا ... ابيكم تركبون مكيفات لعموشه .. وتخلوني افر متى ماابي ... قالو بس ؟؟ قلت لا .. وابيكم تنزلون البنزين والكهرب وتصلحون الشوارع وتكثرون المدارس وتصلحونهن وتبنون للعالم بيوت سنعه .وتخلون الجوال بلاش. قالو بس؟ قلت ايه .... قالو هذي طلباتك ؟؟ قلت ايه...

قالو اجل انتحر اصرفلك .....

والله وتضيق بي الوسيعه ويروحون العالم كلهم حتى ملعون الوالدين شوشو تركن ... والله وانا اطلع الا هذي عموشه تنتظرن عند الباب قالت هاه نسناس صدز الكلام اللي جاني؟؟؟ قلت وش جاتس؟؟ قالت يبون يركبونلي مكيف؟؟؟

قلت .. عموشه تبينهم يركبون لتس مكيف ؟؟ قالت ايه ..

قلت :: اجل انتحري اصرفلك..........



عسا ماطولت عليكم ؟؟

اهههههههههههههههههههههههههههههه
حلوه ورائعة جدا
اول ماشفت أسم شوشو قلت يمكن انه انا
بس الحمدلله طلع الشيطان
تبي تنتحر بسيطه
رح بجنب لك زليب بس يكون به ماء
وطويلة
وأربط برجلك لك بلكة والرجل الثانيه بلكه
وجودهن مضبوط بلك مرسة
وايقف على جال القليب وارجع على ورى
وبعدين تنصلق حتى تقول طع بالماء.
بغيت أجربة اكالحين يوم انا مثلك ويا هالخجماء يوم تخرب.
بس الخجماء القرنبع سيارتي أشتغلت وهونت.
..........................
تسلم أخوي نسناس على هالروائع والقصص الحلوه
الله يعطيك الف عافيه
تحياتي

افا والله كيف تبي تنتحر وانت ماشاء الله عليك


فلته ومبدع

قسم بالله ان الموت ................. قصدي انك خساره على الموت

لايهمك هذي كله سوالف شوشو الله يلعنه

انت بس لو توقف عند المراة كان تقول ياحليلي

البلشه لو انت منتحر كان ماشفنا الحكي اللي يونس

الله يهديك تقفى لاتخلينا يابعد رمتي هاالرمه

بصراحه يوم قضى اللمزح عز الله انك ونستنا الله لايشده بالك

موضوع رووووووووووووعه ولا احلى

وتسسسسسسسسسسسسسسسسسسسسسسسلم يا بعدي

اقتباااس :

__________________

قال :: تسانك صادز رح خذ رشاش ولد خالك وارم روحك ..(( لعن ابوه يبي يضمن موتتي ))

______________________________

منهو ولد خالك اللي عنده رشاش

<------------------ ابد ماهو دبوس

ههههههههههههه


رووووووعه



أيا بعد خثاريق بعضهم :D


إبداااااع



ننتظر جديدك


سجل حضوري وإعجابي


تحياتي

اقول وش رايك يا حيي تنتحر بطريقه انا موفره لنفسي بس لانك


عزيز وغالي..
راح اعطيه لك

اسمع رح لاقرب بقاله

وقله ابي اي منتج سعودي
راح يعطيك اياه

ازرطه
والله تموووووووووووووت بسرعـــــــــــــــــه.. تدري ليش..

تقووول بالله هذا منتج يستاهل انه يشيل كلمه سعووودي :D:D:D

===============
هذي انا موفره لابو مشاري..

رح لقناة الام بي سي
وتحرى الاخبار
وش الاخباااااااااار العربية والواقع العربي
تموووت قهر:D:D:D:D

ابو مشاري ..

اوخذ ياماخوذ .. تبيني اموت بدزليب؟؟؟

الله يسامحك بالله هذي موتتن سنعه ؟؟؟؟ بعدين لاقالو شلون مات فلان يقولون وقع بالدزليب ..

عوذااااا...

ورابطن ببلكه بعد .... اقول الله لايسلطك علي ..

ناصر اللويش ... يابعد حيي ماعليك زود .. ومشكور ...

الضاوي
منو ولد خالي ؟؟ اصلا منو قالك اني اعرفه .. انا مااعرفه بس اتعيبط ..(( الذله بنت حلال ))


الوبيري .. مشكور يالغالي ..نخدمك بالافراح ..


ابوصوصو..

وينك منذ مبطي يارجل ..عز الله انك جبت الحل المناسب ... خصوصا النفيش ابو ارنب .. اللي تقل طعم فقع .. ماينبلع بس شنسوي .. من الوزا